Rêveberiya Xweser a Bakur û Rojhilatê Sûriyê ji bo alîkariya welatiyan di gel rewşa qedexeya derketina derve, dayîna fatoreyên av, kehrebe û paqijiyê heta 2 mehan (Gulan û Hezîran) betal kirin û biryara belavkirina madeyên xwarinê li welatiyan da.
Piştî biryara Rêveberiya Xweser, meclisên Bakur û Rojhilatê Sûriyê dest bi qeydkirina navên malbatên xizan kirin. Meclisa Kantona Qamişlo bi riya komînan navên malbatên xizan qeyd dike.
Hevserokê Meclisa Kantona Qamişlo Hozan Mejdo li ser mijarê wiha got: “Kampa Newroz hezar pakêtên alîkariyê dabûn me, da ku em li malbatên xizan belav bikin.”
Hozan diyar kir ku ew navên lîsteyan bi riya komînan qeyd dikin û dagirtin û wiha dewam kir: “Lîste li ser sê beşan tên amadekirin (destkurt, xizan, navî). Destkurt malên ku kesê debara wan nînin, xizan malbatên karker ku rojane debara xwe dikin, navî jî malbatên xwedî dikan ku niha dikanên xwe girtine û kar nakin.”
Hozan li ser sîstema belavkirina alîkariyan jî wiha got: “Wê ji bo her komînê, erebeyek bê dayîn û wê alîkariyê li ser malbatên ku navên wan hatine qeydkirin, belav bikin.”
