Hevserokê Bûroya Parastinê ya Rêveberiya Xweser Zeydan El-Asî hişyarî da ku êrîşên artêşa Tirk a dagîrker ên ser Bakur û Rojhilatê Sûriyê dewam bikin û got; “Ev êrîş xebata rêveberiyê ya li dijî Koronavîrûsê asteng dikin.”
Neteweyên Yekbûyî meha borî banga rawestandina bilez a çalakiyên leşkerî kir. Li gorî biryara Konseya Ewlekariyê ya Neteweyên Yekbûyî (NY) ya bi jimara 2254, ji ber belavbûna pandemiya Koronavîrûsê (Covid-19) pêwîst e li tevayiya herêman, mîna Sûriyê, Yemen û Lîbyayê şer were rawestandin.
‘LI SER BANGA GUTERESS ME AGIRBEST RAGIHAND‘
Li ser banga Sekretêrê Giştî yê NY‘yê Antonio Gutress ya agirbestê, Hêzên Sûriya Demokratîk (QSD) 24‘ê Adarê bi daxuyaniyekê agirbest li tevayiya herêmê ragihand. Lê artêşa Tirk a dagîrker û komên çete yên girêdayî wê êrîşên xwe yên ser Bakur û Rojhilatê Sûriyê didomînin, di encamê de gelek kes ji herêmê tên koçberkirin.
‘DAGÎRKER ÊRÎŞÊN XWE YÊN SER HERÊMÊN ME DIDOMÎNIN‘
Li ser mijarê hevserokê Bûroya Parastinê ya Rêveberiya Xweser a Bakur û Rojhilatê Sûriyê Zeydan El-Asî ji ANHA‘yê re axivî.
Zeydan El-Asî diyar kir ku dewleta Tirk sûcên xwe didomîne û got; “Me biryara Neteweyên Yekbûyî ya agirbestê pejirand, lê dewleta Tirk a dagîrker û çeteyên wê êrîşên xwe yên ser herêmên me didomînin.”
El-Asî diyar kir ku dewleta Tirk banga NY‘yê bi cih nayne, rojekê jî sozên xwe pêk neanîne, îro dîsa peymanên xwe yên bi Amerîkayê re yan jî bi Rûsyayê re binpê dike.
