Komîteya Tenduristiyê û Şandeya Aloziyê li gundewarên Dêrazorê gelek navendên karantînayê di çarçoveya pêşîgirtina li Koronavîrûsê de amade kirin, herwiha bijîşkekî ji herêmê diyar kir ku heta niha ti bûyerên koronayê nehatine qeydkirin.
Rêveberiya Xweser a Bakur û Rojhilatê Sûriyê 5ê vê mehê dema qedexekirina derketina derve 15 rojên din zêde kir.
Derheqê tedbîrên pêşîgirtina li Koronavîrusê (Covid-19) de, Komîteya Tenduristiyê ya girêdayî Meclisa Sivîl a Dêrazorê û Şaneya Aloziyê li Dêrazorê navendên karantînayê amade kirin.
2 navendên tenduristiyê li gundewarên rojhilat, navendek li Nexweşxaneya El-Siwer El-Muhedese, navendeke li Nexweşxaneya El-Kîsra ya rojavayê Dêrazorê hatin amadekirin, herwiha di navendan de alav û pêdiviyên guncaw hatin danîn.
Têkildarî van navendan gerînendeyê Nexweşxaneya El-Kîsra û endamê Şaneya Aloziyê ye, Dr. Ehmed El-Umêr wiha got: “Me tedbîrên pêşîgirtina li Koronavîrûsê, keşifkirina nexweş, kesên berê xwe didin nexweşxane û navendên tenduristiyê pêk anîn.” Dr. Ehmed bang li welatiyan kir ku ji têkiliyên civakî di dema qedexekirina derketinê de ji ber parastina ji Koronavîrêsê dûr bikevin û di malên xwe de nin.
Li Dêrazorê ji bo Koronavîrûsê navendên karantînayê hatin amadekirin
