Piştî gelek giliyên welatiyan têkildarî bilindkirina bihayê xwerek, rêveberiya giştî ya zimhêrê bihayên meywe û sebzeyan diyar kirin û diyar kir ku kesên biryarê pêk neynin wê werin cezakirin.
Li Bakur û Rojhilatê Sûriyê, li gorî biryarnameya hevserokatiya Rêveberiya Xweser qedexeya çûnhatinê dewam dike. Lê nexweşxane, navendên tenduristiyê yên giştî û taybet, rêxistinên navneteweyî, Heyva Sor û Xaça Sor, dermanxane, komîteyên dezenfektekirinê, xebatkarên paqijiyê, firûn, dikanên xwerek, erebeyên veguhastina xwerek, şîrê zarokan û stêrên sotemeniyê vekirî dimînin.
Ji bo ku keysbazî çênebe û bihayê pêdiviyan neyê bilindkirin, Rêveberiya Xweser a Herêma Cizîrê bi hevkariya rêveberiya giştî ya zimhêrê ji 24ê Adarê ve dest bi gerên li nava sûkan kir. Wê ev heta bidawîkirina qedexeya çûnhatinê dewam bike.
Hat diyarkirin ku bihayê sebzeyan bilind e. Ji ber wê rêveberiya giştî ya zimhêrê lîsteya sebzeyan li herêma Cizîrê eşkere kir û diyar kir ku kesên li gorî wê tev negerin, wê werin cezakirin.
Rêveberiya giştî ya zimhêrê bang li welatiya kir ku kesên li gorî lîsteyê tev negerin wan agahdar bikin. Rêveberiya giştî ya zimhêrê li 160 dikanên xwerek mûxalefe xist û bi dehan dikanên li gorî lîsteyê tev nageriyayîn girtin.
Rêveberiya giştî ya zimhêrê da xuyakirin ku eger di lîsteyê de guhertin çêbe, wê ragihînin.
