Bi ruhê jiyana komînal jinên gundan ji bo pêşketina kar û xebata çandiniyê alîkariya hev dikin û dibêjin, em bi kar û xebata çandiniyê pêşiya belengaziyê digirin.
Di civaka xwezayî de jinê çandinî pêş xist û civak bi rê ve dibir. Lê piştî derketina tebeqeyan sîstemên desthilatdar civak belav kir û bi avakirina bajaran çanda çandiniyê kêm bû. Lê çanda civaka xwezayî di kesayeta jinên li gundan de zindî ye û ji bo pêşketina çandiniyê di nava kar û xebatê de ye.
Li gundê Til Sexirê yê bajarê Hesekê, jina bi navê Ayşe Îsa (42) diyar kir ku parastina xebata çandiniyê girîng e û wiha axivî: “Ez dayîka 4 zarokan im, hevjînê min jî astengdar e. Em bi çandiniyê û xwedîkirina sewalan, debara xwe dikin. Em pir ji karê xwe hes dikin. Jin bi xwezayê ve girêdayî ye, lewre xweza û jin her du jî afrîner in.”
‘JİYANA KOMÎNAL Dİ JİYANA GUNDAN DE ZİNDÎ YE’
Ayşeyê behsa ruhê civakê kir û wiha got: “Li gundan jin bi ruhê jiyana komînal alkariya hev dikin. Ya ku jiyana gundan xweş û geş dike jiyana civakî ye ku her kes alîkariyê dide hev.”
Jina bi navê Xeyriya Ehmed jî wiha axivî: “Jin bingeha avakirina civakeke saxleme. Kar ne jê mêran tenê ye. Ji dîrokê ve jin ji bo xwedîkirina zarokên xwe, afirandina dermanan û birêvbirina civakê kar û xebatê dike. Di jiyana gundan de jin xwedî rolek çalak e. Emê bi kar û xebatê pêşiya birçîbûn û belengaziyê bigirin.”
‘Jİ BO ALÎKARİYA CÎRANA XWE KAR DİKİM’
Xeyriyayê bal kişand ser amadekariya şînkayiyên demsalê re û wiha got: “Me şitilê bacanan çandine, herwiha me beqdenûs, xes û sîr jî çandine. Îro ez hatime alîkariya cîrana xwe da em giya ji nava sîran rakin û bidin sewalên xwe.”
Xeyriyayê axaftina xwe wiha bi dawî kir: “Bi kar û xebata çandiniyê em pêdiviyên xwe yên jiyanê peyda dikin her wiha em rê li pêşiya belengaziyê digirin.”
