Dilîn EHMED/Ronahî Qamişlo
Ji bo çareserkirina pirsgirêkên civakê, rewşenbîrên Herêma Cizîrê komîteyek ava kirin. Cara yekê ji bo çareserkirina pirsgirêkên civakî, li Qamişlo 13ê Adarê komîteya amadekar a bi navê Ronakbîrên Rojava hat avakirin.
Çawa ku tê zanîn di her civakê de rola rewşenbîran girîng e. Di vê çarçoveyê de komek nivîskar û rewşenbîrên Herêma Cizîrê, piştî du civînên berfireh avakirina komîteyekê pêwîst dîtin.
Di kongreya çapemeniyê de bi daxuyaniyekê komîte hat ragihandin û bang li tevayiya Rewşenbîrên Rojavayê Kurdistanê hat kirin ku li erkê xwe yê rewşenbîriyê xwedî derkevin.
DAXUYANÎ WIHA YE.
Bi mebesta afirandina hişyarî û raperîneke çandî ku rewşenbîr beşdarî çareserkirina pirsgirêkên civakî bibin, em vê gavê davêjin. Herwiha ji bo helwest û rawestana li hemberî êrîş û metirsiyên li ser hebûna gelê me, wek komîte me biryar da ku em erkê xwe yê exalqî û welatparzî pêk bînin.
Endama Komîteya Rêveber a KNK Ebîr Esaf, li ser vê komîteyê ji rojnameya me re axivî. Ebîr Esaf wiha got: “Di vê demê de pêwîstya gelê Kurd bi avakirina komîteyeke bi vî rengî hebû. Lewre rewşenbîr di civakê de xwedî rol in û hêviya me ew e ku pirsgirêkên civakê bi hizir û ramanên xwe çareser bikin. Her gaveke bi vî rengî ku armanca wê çareserkirin be, wê encamin baş ji bo civakê bi xwe re bîne. Kî dibe bila bibe, ya girîng ew e ku, pirsgirêkên civakê werin çareserkirin. Gelê Kurd li her çar parçeyên Kurdistanê gelek zor û zehmetî kişandine û ketiye nava xetera bişaftinê. Lê bi berxwedanê kariye xwe û çanda xwe biparêze. Ji bo parastina van destkeftiyan, avakirina komîteyên bi vî rengî gavên pîroz in. Ji bo karê wan em serkeftinê dixwazin.
