Pisporên xwerek pêşniyar li welatiyan dikin ku giyayên biharê bibin xwarinên sereke û gotin; “Divê welatî giyayên biharê kom bikin û berî ku hişk bibin bi kar bînin.”
Li Kurdistanê bi hatina biharê re bi sedan nifşên giya û pincarê şîn dibin. Li gorî agahiyên ji Saziya Riwek a Kurdistanê hatîn girtin, piştî Çînê di warê pincar û giya de welatê herî dewlemend Kurdistan e. Ser sê hezar nifşî re giyayên cuda li Kurdistanê hene. Hinek ji wan ji aliyê welatiyan ve tên xwarin. Herwiha bi hatina biharê re bazar tejî giyayên xwezayî dibe û xwesteka welatiyan li ser zêde ye.
Di demsala biharê de, tolik, kereng, rêvaz, karî, mend, sîrik û hwd şîn dibin.
Li gorî pisporê xwerek Mihemed Faruq, ji bo tenduristiyê faydeya van giyayên xwezayî gelek heye. Lewre rêjeyek zêde av, hesin, proteîn, mîneral û vîtamînan dihevîne ku her yekê faydeya wê ji bo tenduristiyê heye. Wek mînak, hesin ji bo hevsengiya xwê û başkirina bêhntengiyê baş e.
Mihemed Faruq wiha qala faydeya giyayên xwezayî kir, “Rêvaz çavkaniyek baş a vîtamîna D ye. Piraniya giyayên xwezayî yên tên xwarin, madeya dijî toksîn tê de hene. Ji bo parastina laş baş in. Ji bo tinekirina hucreyên penceşêrê dibin alîkar. Yek ji girîngtirîn sûdê giyayên biharê ew e ku qet madeyên kîmyawî di wan de nîne. Gelek girîng e ku welatî giyayên xwezayî bixwin, bi taybetî nîvro û êvaran.”
