Nûnerên partiyên siyasî yên başûrê Kurdistanê diyar kirin ku armanca dewleta Tirk, tinekirina gelê Kurd e û banga derxistina leşkerên Tirk ji başûrê Kurdistanê kirin. Herwiha gotin, divê aliyên siyasî ji bo derxistina leşkerên Tirk bi hev re kar bikin.
Nerazîbûna li dijî dagîrkeriya dewleta Tirk ya li başûrê Kurdistanê dewam dike. Endamên Tevgera Goran, Hizba Şuî ya Kurdistan û Yekîtiya Nîştimana Kurdistanê (YNK) li ser dagîrkeriya dewleta Tirk ya li başûrê Kurdistan û helwesta hizbên xwe ya li hemberî dagîrkeriyê, ji Rojnews re axivîn.
Endamê Tevgera Goran Haşim Salih bang li aliyên siyasî kir ku dijî destwerdana li başûrê Kurdistanê, dagîrkerî û derxistina leşkerên Tirk, bi hev re kar bikin û dawiyê li dagîrkeriyê bînin.
Berpirsê komîteya Şehîdên Yekîtiya Nîştimana Kurdistanê Mihemed Heme Salih jî diyar kir ku dewleta Tirk li dijî Kurdan tevan e û got, dewleta Tirk bê ku cudayiyê bixe nava Kurdan, hewldanên xwe yên ji bo tinekirinê didomîne. Wek YNK em li dijî hebûna her leşkerê li ser xaka Başûrê Kurdistanê ne.”
Endamê komîteya Hizba Şuî ya Kurdistanê a Germiyanê Pêşrew Reşîd jî li ser heman mijarê nêrîna xwe par ve kir. Li gorî Pêşrew, dewleta Tirk ji lihevkirina sala 80’î ya dinavbera Iraq û Tirkiyeyê de sûdê digre, ji bo wê jî dagîrkeriya xwe didomîne. Pêşrew da zanîn ku dagîrkeriya Tirk roj bi roj berfirehtir dibe û got; “Wek Hizba Şuî em her tim daxwaziya derxistina leşkerên Tirk û hêzên din yên dagîrker yên li ser xaka Iraqê û Kurdistan dikîn.”
Pêşrew herî dawî bang li hêzên Başûrê Kurdistanê kir ku leşkerên Tirk ji xaka Başûrê Kurdistanê derxin.
Nûnerên partiyên siyasî: Divê leşkerên Tirk werin derxistin
