Dawiya sala borî û destpêka vê salê, gelek bûyerên girîng li Sûriyê qewimîn. Ji aliyekî ve Trump vekişandina hêzên Emerîkayê ji bakurê Sûriyê ragihand. Wê jî rê ji Tirkiyê re vekir ku bajarê Serêkaniyê û Girê Spî dagîr bike. Ji aliyekî din ve Rûsya û Tirkiyê li bajarê Idlibê li hemberî hev sekinîn.
Girêdayî mijarê lêkolînerê American Project Institute for Public Policy Research (AEI) û berpirsê berê yê Pentagonê Michael Rubin girêdayî stratejiya Emerîka ya li Sûriyê ji ANHA re wiha axivî: “Trump dixwaze Emerîka ji Sûrî derkeve. Lê gelek kesên Emerîkî yên xwedîbiyar di nav de mezintirîn şêwirmendên wî dikevin ferqa girîngiya stratejîk a mayîna li herêmê. Kesên siyaseta Emerîka bi rê ve dibin ji mayîna li Sûriyê dixwazin rê li pêşiya Îranê bigirin da ber bi rojhilatê Deryaya Spî ve belav nebe.”
SİYASETA DERVE Û İSTİXBARATÊ HEMÛ DİZANİN
Rubin, dewama axaftina xwe de wiha got. “Ji bilî Trump û nûner James Jeffrey, pisporên siyaseta derve û istixbaratê hemû dizanin ku Tirkiye desteka DAIŞ`ê dike û Tirkiye girîngiyê nade têkoşîna li dijî rêxistina El-Qaîdeyê. Piştî axaftina di navbera Erdogan û Trump de û vekişîna ji nişkan ve ya hêzên Emerîkayê, generalê malnişîn Jack Kane Trump îqna kir ku qadên petrolê yên Sûriyê biparêze da vekişîna ji Sûriyê rawestîne. Ev ne sedemeke berbiaqil e. Bi taybetî dema em li sedemên stratejîk û exlaqî yên mayîna DYA`yê li Sûriyê binêrin. Lê ew ew egera sereke bû ku Trump îqna bibe ku li Sûriyê bimîne.
Li ser lihevhatina Rûsya û Tirkiyê jî Michael Rubin wiha axivî: “Rûsyayê xiyanet li Tirkiyê kir. Her tim Erdogan xwe di radeya Putin de didît. Lê Putin vê carê Erdogan weke xizmetkarekî zelîl dît. Putin, Erdogan neçar kir ku biçe Moskovayê. Rêbaza ku hişt Erdogan li derveyî hola civînê li bendê bimîne, bi kar anî. Erdogan destvala ji Moskovayê vegeriya. Ew tiştek gelek şerm e.
Di rastiyê de Rûsya û rejîma Sûriyê di hundirê Sûriyê de bûn hêzeke sereke. Tirkiye dikare li axa Sûriyê bi erêkirina Putin tene kar bike.”
