QASIM ENGÎN
Pêwîst e êdî were zanîn ku yên Erdogan wek gurekî dîn û har diajon ser Kurdan NATO ye. Yên Erdogan wek Gayê Îspanya li dijî Kurdan bi kar tînin jî NATO ye.
Em bala xwe bidinê; yên Tirk anîn Cerablûs, Bab, Îdlîb, Efrîn, Girê Spî û Sere Kaniyê jî NATO ye. Ev hemû ka çawa bi rêbazên pir plankirî hatine kirin, bi gotinên kesê bi navê Sekreterê Giştî yê NATO Stoltenbergê hê başti fêm dibe.
Stoltenberg di pêvajoyekê de ku Erdogan Kurdan li Rojava û li Şingalê jî pêşengên wan weke DAIŞ’iyan dikuje, dide diyarkirin ku, hêza herî zêde li dijî DAIŞê şer kirî û pêşiya tehdîda DAIŞê girtî dewleta Tirk e.
Pir balkêş e ku; çi Ewropî, çi Amerîkî û çi Rus û çi jî gelek hêzên Ereban, pir eşkere û bi belgeyan nîşan dabûn ku dewleta Tirk bi serokkomarê xwe Erdoxan bi DAIŞ re eleqadar e û yê herî zêde piştgirî dayî DAIŞê jî carek din Erdoxan bixwe ye.
Çawa DAIŞî çek ji Tirkan girtine û çawa DAIŞê petrol firotiye Tirkan, bi belgeyan hatibû piştrastkirin. Herkes dizane ka Rûsan konvoyên petrola DAIŞ ji Tirkan re dibirin, çawa bombebaran kiribûn. Û herwiha herkes dizane ku rayedarên Amerîkî gelek caran nîşan dan ku, yên nahelên DAIŞ biqade dewlete Tirk bixwe ye. Ji ber wê gelek caran gotibûn, ji bo ku bikarin li dijî DAIŞê bikin, divê sînorê DAIŞê û Tirkan were qutkirin.
Digel ku rastî ev in û dewleta Tirk bûye palpişta DAIŞê, gotinên kesê bi navê Stoltenberg nîşan didin ku yên Erdoxan û dewleta Tirk bi her awayî ji bo piştgiriya DAIŞ gurr û geş kirîn, NATO ye. Di wê manê de yên Erdoxan li dijî Kurdan sor dikin û sor jî kirine NATO ye. Êdî ev bi her awayî zelal bûye.
Dîsa di wê manê de pêwîstî heye ku her Kurd û herwiha her ferdê vê axê bizane ku NATO biryara qirkirina wan bi destên Tirkan daye. Ji ber wê bêhesab piştgiriya xwe ji dewleta Tirk ya dagîrker û faşîst re eşkere diyar dikin. Gotinên din yên weke; ”em we bernadin em nahêlên hûn werin kuştin” tev derew in.
Em bizanin ku gotinên Stoltenberg piştî kuştina lehengê mezin Zerdeşt Şingalî ji milê dewleta Tirk ve hatine kirine. Bi gotineke din Stoltenberg bi van gotinan kuştina Êzîdiyan rewa dibîne.
Em di gotinên Xanima Alman Merkel ya qirkirina Kurdan bi piştgirîkirina dostê xwe yê bi diran û devê xwîn jî heman tişta dibînin.
Bê ku em dirêj bikin, êdî pêwîstî heye ku Kurd pişta xwe nedin NATO, yan jî hêzên NATOyê. Wisa xuya dike ku serokê Fransa Macron beredayî negotibû ”Mirina Nato ya mêjî pêk hatiye.” Rastî jî ev gotinên Stoltenberg nîşan didin ku hem êdî NATO miriye, hem rayedarên wê mêjiyên xwe xwarine.
Çawa ku tê zanîn yên ji milê mêjî ve mirîn, ne mûmkin e mirov gotin û ji biryarên wan bawer bike. Kes û saziyên wiha ka wê kengê çi bikin û çawa tev bigerin ne diyar e.
Eger rastî wiha ne, Kurd çawa dikarin pişta xwe bidin NATO, Amerîka, Almanya û her wiha? Gotinên Stoltenberg nîşan didin ku divê Kurd pişta xwe bidin xwe tenê.
Bêguman pêwîstî heye ku Kurdên li seranserê cîhanê, bi nameyan xwe, kesê bi navê Jens Stoltenbergê bêhastû û Xanima her tim ji ber difna Erdoxan dûr nakeve, ji ber geşkirina kuştina Kurdan li her cihî şermezar bikin!
