Tabûra Şehîd Nûbar Ozanyan a Ermen di salvegera 13. a kuştina wî de rojnamevan Hrant Dînk û her sê jinên şoreşger ên li Parîsê hatîn kuştin bîr anîn.
Bîranîn bi merasimeke leşkerî dest pê kir. Paşê fermandarê tabûra Şehîd Nûbar Ozanyan, Nûbar Melyonyan bi Ermenî û Kurdî axivî.
Fermandar Nûbar, Hrant Dînk bi rêzdarî bîr anî û got, “Rêhevalê me Hrant Dînk şoreşgerekî Ermen bû û li ser heqîqata derxistina komkujiyan meşiya. Tevî ewqas gefên dewleta Tirk, dîsa serî dananî. Heman mehê li Parîsê Sakîne Cansiz, Leyla Şaylemez, Fîdan Dogan jî bi rengekî hovane bi destê dewleta Tirk a dagîrker weke Hrant Dînk hatin kuştin. Ev hevriyên me dizanîbûn ku bêbedel em azadiyê bi dest naxin. Lê wan şoreşgeran ti carî li hemberî hovîtiyê serî dananîn. Em ti carî şehîdên xwe ji bîr nakin, riya wan riya me ye.”
Şervana jin ya endama Tabûra Şehîd Nûbar Ozan Sosin Serkîs jî, tekildarî salvegera kuştina Hrant Dînk diyar kir ku li ser armanca tinekirina Ermeniyan Hrant Dînk hat kuştin û got, “Me hêz û girîngiya rêxistinbûna xwe ji têkoşîn û berxwedana şehîd Hrant Dînk girt. Ew jî bû bingeh ji me re û di gavavetinên me de cih girt. Dewleta Tirk a dagîrker îro jî li Bakur û Rojhilatê Sûriyê li dijî gelan komkujiyan dike. Emê dewleta Tirk a dagîrker û çeteyên wê ji warên xwe derxin û wan tine bikin. Heta dawiyê emê li ber xwe bidin û li ser şopa şehîdan bimeşin. ”
