Şêniyên Helebê tecrîda li ser Rêber Ocalan şermezar kirin û gotin; “her ku em serkeftinan bi dest dixin, Tirkiye bi ser Rêbertiyê de diçe.”
Dewleta Tirk a dagîrker li dijî Rêber Ocalan tecrîdê didomîne. Her wiha ji 21`ê Cotmehê ve cezayê dispilînê li ser rêbertiyê û 3 girtiyên din biriye. Parêzeran gilîname pêşkêşî dozgeriyê kirine lê dîsa hat redkirin.
Di vê mijarê de ajansa Hawar bi şêniyên Helebê re hevdîtin çêkirin. Şêniyên Helebê kiryarên dewleta Tirk ên li dijî Rêbertiyê şermezar kirin û bang li rêxistinên mafên mirovan kirin ku li dijî binpêkirinên artêşa Tirk bisekinin.
Welatiyê bi navê Hemîd Mistefa got; “Ocalan banga yekîtî û mirovayiyê dike. Ji bo gelên Rojhilatanavî hemûyan têkoşînê dike. Li ser vî bingehî em bang li cîhanê û gelan dikin ku azadiya Ocalan bixwazin. Gelo ka wijdana cîhanê? Em şer naxwazin, em gelekî aştîxwaz in û banga heqiyê dikin. Ji ber wê bindestiya gel û tecrîda li ser Rêberê xwe red dikin.”
Wêlatiyê bi navê Remzî Bekir jî got; “Em tecrîda li ser Ocalan û her 3 hevalên wî şermezar dikin û wek gelê Kurd em bang li aliyên pêwendîdar dikin ku zorê bidin dewleta Tirk. Ocalan tenê banga mafên pêkhateyan kir û cudabûn nexist nava gelan. Ji ber wû emê bi hêza felsefeya Ocalan banga demokratîbûnê bikin.”
Welatiya bi navê Zûleyxa Hemûd jî wiha axivî: “Em jî tecrîda li ser Ocalan şermezar dikin û emê heta rakirina tecrîdê li qadan bin. Her ku em pêş ve biçin, emê serkeftinan bi dest bixînin û wê Tirkiye jî bi ser Rêber Ocalan de biçe. Ev jî nîşana tirsa Tirkiyê ji felsefeya Ocalan e.”
