Dilîn EHMED/Ronahî Qamişlo
Şêniyên Qamişlo carek din ji êrişên dagikeriyê re got ‘NA’. Duh şêniyên Qamişlo li dijî êrişên dagirkeriya Tirk meşek girseyî li dar xistin. Şêniyan di meşê de al, wêneyên pakrewanan û pankarên ku dagirkeriyê şermezar dikin hil dan. Gelên bajarê Qamişlo siloganên NA ji dagirkeriyê re bez kirin.
KESEK NIKARE VÎNA TÊK BIBE
Jina bi navê Zekiye ku dayîka şehîdekî ye, di derbarê êrişên dagikeriyê got: “Bi têkbirina çeteyên DAIŞ re, her kesî vîna gelê me nas kir. Her çendî faşîzm êriş bike, gelê me serê xwe natewîne. Gelê me di encama ked û xwîna şehîdan de hatiye vê rojê. Wê tu carî ji şopa wan venegere. Em heya dawiyê li ber xwe bidin”.
ERDOGAN PIŞTEVANÊ DAIŞ E
Welatiyê bi navê Nûrî Bekir jî nerîna xwe wiha anî ziman: “Dunya dizane ku piştevanê çeteyên DAIŞ Erdogan e. Ji bo wan zindî bike û hegemoniya li herêmê berfirehtir bike, êrişî bakur û rojhilatê Sûriyê dike. Gelê me îro bi vê meşa xwe raber dike ku; çi dibe bila bibe, ew ê herêmên ku bi xwînê hatine rizgarkirin, biparêze. Em ê bi berxwedana xwe êrişên hov têk bibin”.
