Sîsin ÇIYA/ Ronahî Qamişlo
Piştî êrişên dagirkeriya Tirk û çeteyên wê yên 9 Cotmehê, parelelî nerazîbûna gelêrî û ya navneteweyî, Meclîsa Îslama Demokratîk duh li yarîgeha 12 Adarê nimêja înê kir û daxuyaniyek da.
XAKA TAHÎR MIZGEFT E
Mele Mazin Mihemed xetîbê mizgefta Qasimo di vê derbarê de got: “Nimêja me bi mebesta dua û lavayan e. Bila dunya zanibe ku mislimantî ne tenê kişandina tizbiyan, çûn û hatina mizgeftan e. Xaka tahir li ku be ew mizgefta bawermendan e”.
Mele Mihemed diyar kir: “Em jî weke bawermend dengê xwe li dijî dagirkeriyê bilind dikin. Dagikeriya ku li pêş çavên hemû cîhanê rû dide em ê ti carî qebûl nekin”.
Mele îşaret pê kir û got: “Dapîrên vî dijminî li ser destê dapîrên me bûne misliman. Me pêşengtiya mislimantiya wan kiriye. Îro jî ew dibêjin em ne misliman in!”. Mele Mihemed wiha didomîne: “ Qaşo ew in ên ku bi navê biratiya mislimanan bang dikin. Karê ku li dijî baweriya mislimantiyê dikin baş rave dike ka çiqas misliman in. Ew ji van têgehên mislimantî û mirovahiyê ve dûr in. Kesên ku di bin navê îslamê de kuştina gelan helel dikin, Meclîsa Îslama Sûrî, ne misliman in. Bê sûc û guneh sivîlên me dikujinz”.
QÛR`ANA PÎROZ BEREVAJÎ DIKIN
Mele Mihemed hestên xwe jî bi vî awayî gotin: “Em ji kesên xwedî wîjdan û îman dixwazin ku piştgiriya mirovan bikin. Dengê xwe tevlî dengê me bikin ku vê hovîtiya di bin navê îslamê de tê kirin bisekinînin. Îro faşîzm bi berevajîkirina ayetên Qûr`ana pîroz êrişan pêk tîne.”
Mele Mazin Mihemed di dawiya axaftina xwe de ev bang kir û got: “Em bang li bawermendan dikin ku; eger mîsqalek bawerî di dilê wan de hebe, bila îro bersiva van çeteyan bidin. Rastî û heqîqeta wan li ber çavê hemû cîhanê ye”.
