Ayşa Silêman/ Dêrik
Îro li bajarê Dêrikê û gundewarên wê bawernameyên sala xwendinê ya 2025- 2026’an li xwendekaran hatin belavkirin. Xwendekaran diyar kirin ku zimanê Kurdî hebûna wan e û ew bi bawernameyên xwe serbilindin.
Îsal rewşa xwendinê li Rojavayê Kurdistanê cûda bû, ji ber rewşa siyasî ya ku herêm têre derbas bû, rêjeya koçberiyê zêde bû lewma koçber li dibistanan bicih bûn û xwendin hat rawestanin. Lê Desteya Fêrkirin û Perwerdeyê biryar da ku li gor werzê yekem bawernameyên xwendekaran werin belavkirin da ku sala bê xwendekar refeke nû bixwîne û dibistana xwe berdewam bike.
Di derbarî wergirtina bawernameyan û girîngiya fermîkirina bawernameyên xwendekarên Rêveberiya Xweser, Rêveberê Dibistana Yûsiv Elezeme Mihemed Şefa Silêman û xwendekara bi navên Jiyan Mihemed ji Rojnameya me re axivîn.
‘Zimanê kurdî hebûna me ye’
Mihemed Şefa Silêman da zanîn ku îro biryar hat girtin ku bawernameyên xwendekaran werin belav kirin û wiha got: “Ev bawernameyên ku di nav destên me de cihê şanazî û kêfxweşiyê ne ji bo me, em jî wek mamoste ji her kesî re didin diyarkirin ku zimanê me gelekî girînge. Biryara fermîkirina bawernameyên me ji hêla hikumeta demkî ve hat li darxistin, em di wê hêviyê de ne ku zimanê me jî li seranserî sûriya were qebûl kirin û bibe zimanekî fermî di dibistanan de. Zimanê kurdî hebûna me ye em ê li ser vî esasî perwerdeyên xwe berdewam bikin ji ber ku zimanê me zimanekî kevnare bi hezarê salan li ber xwe daye û tu kesî nikariye wê tune bike. Em jî weke mamoste em ê li ser doza berdewam kirina vî zimanê bimînin.”
Parastina ziman û nasnameyê
Jiyan Mihemed anî ziman her netewek bi zimanê xwe tê naskirin gelê Kurd jî bi zimanê xwe tên nas kirin û wiha got: “Em îro gelek kêfxweşin ku em ê bawernameyên xwe bidest bixin, destpêka ku me bi zimanê dayîkê dixwendin herkesî ji me re digot xwendina we vala ye lê îro roj bi saya şehîdn û keda ku kirin ji bo axa welat bawernameyên me bi awayekî fermî hatin qebûl kirin. Em ê xwendina bi zimanê xwe berdewam bikin û parastina çand û nasnameya xwe bikin heya ku zimanê me li seranserî cîhanê bibe zimanekî fermi.”
