Ronahî Sadûn/Qamişlo
Ajokarên erebeyên xetên bajarê Qamişlo yên taybet û giştî ji ber bilindkirina nirxê sotemeniyê li pêş Rêveberiya Sotemeniyê çalakiyeke protêsto lidar xistin û tê de daxwaze kêmkirina nirêx sotemeniyê kirin.
Li hemberî bilindbûna nirxê sotemeniyê, ajokarên erebeyên taybet û giştî yên li bajarê Qamişlo nerazîbûna xwe nîşan dan. Herwiha bi sedan ajokaran li pêş Rêveberiya Sotemeniyê ya bajarê Qamişlo ya li Taxa Elaya çalakiyeke protêsto li dar xistin. Di çalakiyê de dirûşmeyên “Na ji bilindbûna sotemeniyê” hatin bangkirin.
Piştre rêveberên yekîtiyên erebeyan yên hemû xetan bi rêveberiya sotemeniyê ya li bajêr re rûniştin û daxwazên hemû ajokaran anîn ziman ku tê de hêviya kêmbûna nirxê sotemeniyê hate kirin. Herwiha ajokaran diyar kirin ku ew ji gel in û bilindbûna kirê ji wan re jî zor e, lewra ew daxwaz dikin ku zirar ne li wan û ne jî li gel bê kirin. Di heman demê de Rêveberiya Sotemeniyê jî bersiva wan da û hêviyên wan pêşwazî kirin û got ku ew ê van hêviyên wan bighînin aliyên pêwendîdar û li ser vê yekê were rawestandin.
