Bi dirûşma “Bi hev re ber bi Sûriyeke demokratîk, pirreng û nenavendî ve” Partiya Pêşerojê ya Sûriyê civînek ji şêniyên bajarokê El-Sûr ê gundewarên bakurê Dêrazorê re li dar xist.
Bi armanca guhdarkirina li nerînên şêniyan û danasîna armancên Partiya Pêşerojê ya Sûriyê, partiyê civînek ji şêniyên bajarokê El-Sûr ê Dêrezorê re li dar xist. Bi sedan şêniyên bajarok û gundên wê, serokê Partiya Pêşerojê ya Sûriyê Ibrahîm El-Qeftan û gelek endamên partiyê şaxê Dêrazorê beşdarî civînê bûn.
Ibrahîm El-Qeftan di civînê de axivî û da zanîn ku armanca partiyê avakirina Sûriyeke nenavendî ye ku itîrafê bi hemû pêkhateyan dike û kesî paşguh nake û got: “Em nahêlin kes welatê me Sûriyê parçe bike, her wiha em binpêkirinên Tirkiyê li xaka Sûriyê ku hewl dide aloziya xwe ya hundirîn derbasî welatê me bike, qebûl nakin.”
El-Qeftan, berpirsyariya koçberkirin û kuştina gelê Sûriyê bi hemû pêkhateyên wê girt ser dewleta Tirk a dagirker û bang li şêniyan kir ku li pêşiya hemû cureyên êrîşên ku gefan li ewlehî û îstiqrara herêmê dixwin, bisekinin.
Şêniyan gelek pirs der barê pêşeroja herêmê de di aliyê siyasî û xizmetguzarî de kir û endamên partiyê pirs bersivandin.
Hêjayî gotinê ye ku Partiya Pêşerojê ya Sûriyê dê di rojên pêş de rêzecivînan ji şêniyên gundewarên Dêrazorê re li dar bixe.
