Ayşa Silêman/ Dêrik
Meclisa Malbatên Şehîdan a bajarê Dêrikê bi daxuyaniyekê daxwaza şervan û zarokên xwe yên ku di destê Hikumeta Sûriyê ya Demkî de ne, kirin.
Meclisa Malbatên Şehîdan a bajarê Dêrikê li pêşiya navenda xwe bi daxuyaniyekê daxwaza şervan û zarokên xwe yên ku di destê Hikumeta Sûriyeyê ya Demkî de kirin. Di daxuyaniyê de hemû endamên saziyên rêveberiya xweser amade bûn.
Di destpêka daxuyaniyê de Meclisa Malbatên Şehîdan bal kişandin li ser rewşa dîlgirtiyan û wiha gotin: “Bi navê her dayîkeke ku li benda xeberekê ye ji zaroka xwe û her malbateke ku di rêya rûmeta vê axê de tiştên herî bi qîmet feda kirine, em vê daxuyaniyê pêşkêşî raya giştî ya cîhanê, rêxistinên mafên mirovan û hemû aliyên aktîf di qada Sûriyê de dikin. Mijara dîl û girtiyên li gel hikumeta sûriyeyê ya demkî ne tenê dosyeyeke siyasî yan jî kaxezeke bazirganiyê ye, lê dozeke mirovî û exlaqî ye ku bandorê li wijdanê her malekî li herêmên me dike. Berdewamiya girtina van kesan dûrî malbatên wan û di şert û mercên ku kêmî pîvanên dadperwerî û qanûnên navdewletî ne, binpêkirineke eşkere ya mafên mirovan e.”
Di berdewamiya daxuyaniyê de wiha hat gotin: “Em daxwaz ji Hikumeta Sûriyê ya Demkî û aliyên peywendîdar dikin ku bi lez û bez hemû dîlgirtiyên li cem xwe azad bikin û çarenûsa windayan bê şert û merc eşkere bikin. Her wiha em bang li hemû aliyên navdewletî yên aktîf, rêxistinên mirovî û Rêxistina Xaca Sor a Navdewletî dikin ku erkên xwe yên qanûnî û exlaqî bi cih bînin û zexteke cidî bikin ji bo zanîna cihê van dîlan û misogerkirina silametiya wan a bedenî û derûnî.”
Di dawiya daxuyaniyê de wiha hat gotin: “Eşkerekirina çarenûsa van lehengan mafekî pîroz ê malbatên wan e. Vegerandina wan bo hembêza dayikên wan daxwaza me ya bingehîn e da ku agirê benda-manê vemirîne û dilê malbatên şehîd û girtiyan şa bike. Em wek Meclisa Malbatên Şehîdan, soza xwe nû dikin ku em ê li pişta doza girtiyên xwe bisekinin heta ku em wan di nav xwe de azad bibînin.”
