Solîn Mihemed/ Qamişlo
Desteya Çandê bi daxuyaniyekê sedemên nelidarxistina çapa 11’emîn a Festîvala Huner û Çanda Jinê ku wekî her carê di 1 û 2’yê Adarê de dihat pilankirin, rave kir û di daxuyaniyê de lêborîn xwest.
Ji ber ku îsal Desteya Çandê nikarîbû çapa yazdehemîn a festîvala huner û çanda jinê ku wekî her carê di 1 û 2 yê Adarê de dihat pilankirin, bi daxuyaniyekê li pêşiya navenda Mihemed Şêxo ya li bajarê Qamişlo lêborîna xwe rave kir. Daxuyanî bi zimanê Kurdî û Erebî hat xwendin.
Di destpêka daxuyaniyê de wiha hat gotin: “Hunera Desteya Çandê ji ber ku îsal, 2026’an, nikarîbû çapa yazdehemîn a festîvala huner û çanda jinê, ku wekî her carê di 1 û 2 yê Adarê de hatibû plankirin, organîze bike û finanse bike, lêborîna xwe ji hemû jinên cîhanê û ji hemû hunermendên jin ên ku beşdarî Festivala Huner û Wêjeya Jinan dibin û piştgirî didin wê, dixwaze.”
Di berdewamiya daxuyaniyê de wiha hat gotin: “Vê lêborînê wekî encamek ji rewşên awarte yên ku herêm pê re rûbirû tê, di nav de entegrekirina gelek desteyan di nav avahiya nû ya hikûmetê de, û her wiha di vê heyamê de zehmetiyên têkildarî mekanîzmayên finansekirinê. Van rewşan rê li ber rêxistinê girtiye ku erkên xwe yên rêxistinî û darayî yên ji bo festîvalê bicîh bîne.
Li ser bingeha berpirsiyariya me ya çandî û exlaqî, em ji nû ve teqdîrkirina xwe ya kûr ji bo rola pêşeng a jinan di afirînerî û hunerê de dubare dikin, û em hewildanên hunermendên jin di dewlemendkirina çandî de girîng dibînin. Her wiha em piştgiriya xwe ya tevahî ji bo organîzekirina festîvala îsal wekî beşek ji bernameya 8’ê Adarê ji hêla saziya Hîlala Zêrîn ve diyar dikin, û ji wan re serkeftin û geşbûnê di hilgirtina vê peyama girîng a çandî de dixwazin.”
Daxuyanî wiha hat bidawî kirin: “Em hêvî dikin ku Deste vê qonaxa awarte derbas bike, û sala bê em ê vegerin organizekirina festîvalê bi awayekî ku li gorî dîrok û afirîneriya jinan be, û pabendbûna me ya xurt bi çand û hunerê nîşan bide.”
