Esmihan Gedro/Qamişlo
Meclisa Jin a Partiya Yekîtiya Demokratîk PYD`ê li bajarê Qamişlo bi daxuyaniyekê Komploya Navnetewî ya li dijî Rêber Abdullah Ocalan şermezar kir.
Di salvegera Komploya Navnetewî ya li dijî Rêber Abdullah Ocalan, Meclisa Jin a Partiya Yekîtiya Demokratîk PYD`ê li pêşiya navenda xwe ya bajarê Qamişlo daxuyaniyek da û tê de komplo şermezar kir.
Bi beşdariya endamên PYD daxuyanî bi zimanê Kurdî û Erebî hate xwendin.
Di destpêka daxuyaniyê de wiha hat gotin: “Di salvegera bîst û heftemîn a komploya navneteweyî ya li dijî Rêber Abdullah Ocalan de, komployek ku di dîroka gelê Kurd de kêliyek girîng pêk anî, û girtina wî bandorek kûr li ser rêça veguherînên siyasî li Rojhilata Navîn a hemdem kir. Dîlgirtina Rêber Apo ne operasyoneke girtinê ya asayî bû, lê belê komployeke mezin a îstîxbaratî ya navneteweyî bû ku hêzên navendî û ajansên îstîxbaratî yên cîhanî tê de beşdar bûn, armanca wê jî têkbirina ramana azadîxwziyê û nêzîkatiya demokratîk a ku ji bo gelên ku dixwestin rûmet û azadiyê bibin çavkaniya îlhamê bû.
Berxwedana ku Rêber Ocalan di van salan de nîşan da dîrokî bû. Ji kêliya girtina wî ya li Zindana Îmraliyê ve, wî zindan veguherand çirayek ramanê. Di tecrîda dijwar de, wî projeyek rewşenbîrî ya rizgarker pêşxist ku têgehên azadî û civaka demokratîk ji nû ve pênase kir. Îro, ev raman bi pratîkî di ezmûna Rojava de têne bicîhkirin, ku jin di pêşengtiya serokatiyê, rêxistin û biryardanê de radiwestin, û dirûşmeya “Jin, Jiyan, Azadî” dikin pratîkek civakî ya rojane, ne tenê gotinin.”
Daxuyanî wiha hat domandin: “Îro, di nava êrîşên zêde yên li dijî herêm û gelên me de, careke din eşkere ye ku tiştê ku diqewime ne rêze bûyerên îzolekirî an pêşketinên demkî ne, lê belê berdewamiya rasterast a wê komployê ye, ku bandorên wê neqediyane lê tenê bi awayên cûda têne nûkirin. Armancgirtina sîstematîk a Şoreşa Rojava û Rêveberiya Xweser a Demokratîk ku jinan di damezrandina wê de rolek pêşeng lîstin, sernavek nû di vê komployê de û hewldanek eşkere ye ji bo şikandina îradeya gel û têkbirina modela aramiyê ya li ser bingeha jiyana hevbeş, wekhevî û azadiya jinan e.
Em weke, Meclisa Jinan a Partiya Yekîtiya Demokratîk (PYD), berdewamiya vê komployê şermezar dikin û tekez dikin ku hemû armancên ji bo şikandina îradeya gelê Kurd têk çûne. Berxwedana ku gelê Kurd li her çar parçeyên Kurdistanê nîşan da û şoreşa jinan li Rojava delîlên zelal in ku felsefeya Rêber Abdullah Ocalan bûye rastiyek zindî ku nayê jiholêrakirin. Projeyên ku li ser îradeya gel hatine avakirin bi zorê nayên bêdengkirin û ramana ku ji dîwarên zindanan hatiye rizgarkirin bûye hêzek civakî û siyasî ya bi hêz ku tu komployek nû nikare rawestîne.”
Daxuyanî wiha hat qedandin: “Ji bo me, azadiya Rêber Abdullah Ocalan azadiya hemû gelan, rizgariya jinan û serkeftina nirxên edaleta mirovahiyê temsîl dike. Ji ber vê yekê, em bang li hêzên neteweyî û demokratîk û raya giştî ya cîhanî dikin ku têkiliya di navbera komploya heyî û êrîşên heyî de bibînin û ji bo parastina projeya civaka demokratîk û Şoreşa Rojava, ku hêviya rastîn a gelên herêmê temsîl dike, bixebitin.”
