Navenda Nûçeyan
Federasyona Gaziyên Bakur û Rojhilatê Sûriyeyê; Şehîd Sorxwîn û Azadî ku di 11’ê Sibata 2024’an li Qamişlo di encama êrîşeke bi balafirên keşfê ya dewleta Tirk de gihiştin şehadetê. Dewleta Tirk a di şerê li hember gelê Kurd de ti pîvan û nirxekî mirovî nas nake, ji tirs û xofa li hember têkoşîna jinan û îradeya gaziyên şer her du hevrêyên me kir hedef.
Daxuyaniya Federasyona gaziyan wiha ye; Têkoşîna me ya azadiyê ya di roja me ya îro de ji hemû jinan û civakan re bûye hêvî û îlhama jiyana azad û wekhev bi saya şehîdên me yên nirxên herî pîroz in ber bi serketina dîrokî ve diçe.
Ev têkoşîn û berxwedana bi felsefe û fikra Rêber Apo hatiye strandin, di nav xwe de gelek lehengên bi rûmet û hêja dihewîne. Hevrê Sorxwîn Rojhilat û Azadî Dêrik jî weke du fermandarên giranbiha bi têkoşîn, sekn û helwestên xwe mohra xwe li dîroka me ya Tevgera Azadiyê dane.
Hevrê Sorxwîn a ji bajarê Makû ya Rojhilatê Kurdistanê ye, weke şêrejineke herî esîl li her çar parçeyên welêt têkoşîneke bi heybet û muezem pêş xist. Hevrê Sorxwîn di pêvajoya êrîşên hovane û nemerd li ser Kobanê dihatin kirin, bi komek hevalên xwe re ji çiyayên Bakurê Kurdistanê derbasî Rojava bû û tevlî berxwedana rûmetê bû.
Hevrê Sorxwîn a di vê berxwedanê de birîndar bû û çavekî xwe fedayî doza gelê xwe kir, weke nîşaneya jinên milîtan ên fedaî yên Rêber Apo piştî rizgarkirina Kobanê di rêveberiya Federasyona Gaziyên Bakur û Rojhilatê Sûriyeyê de kar û xebateke mînak pêş xist.
Heval Azadî ya ji Dêrika Hemko bû, bi têkoşîn û berxwedana xwe ya bêhempa tevkariyeke girîng li Şoreşa Rojava ya îro li hemû cîhanê weke keleha serhildêran tê dîtin kir. Heval Azadî tevî hemû êş û nexweşiyên xwe di Federasyona Gaziyan de bi eşq û evîneke mezin ji hevalên xwe yên gazî û birîndar re bû destek û alîkar.
Hevrê Sorxwîn û Azadî 11’ê Sibata 2024’an li Qamişlo di encama êrîşeke bi balafirên keşfê ya dewleta Tirk de gihiştin şehadetê. Dewleta Tirk a di şerê li hember gelê Kurd de ti pîvan û nirxekî mirovî nas nake, ji tirs û xofa li hember têkoşîna jinan û îradeya gaziyên şer her du hevrêyên me kir hedef û qetil kir.
Em weke gaziyên şer ên ji bo Şoreşa Rojava ji bedena parçe dane di duyemîn salvegera şehadeta wan de heval Sorxwîn û heval Azadî bi rêzdarî bi bîr tînin. Em ê hêvî û xeyalên şehîdên me di oxira wê de xwe feda kirine tekez bînin cih.
Di vê pêvajoya ku li hember Şoreşa Rojava êrîşên herî hovane pêk tên, bi biryardiyeke mezin weke hevrêyên Sorxwîn û Azadî em ê ji bo parastin û pêşxistina şoreşa xwe berxwedana xwe ya rûmetê bêteredut bimeşînin.
