Ayşa Silêman/Dêrik
Şêniyên bajarê Dêrkê ji bo parastina destkeftiyên Şoreşa Rojava û yekîtiya gelê kurd li seranserî cîhanê bi dirûşmeya ‘Bijî Berxwedana Rojava, Bijî Yekîtiya Gelê Kurd’ meşeke girseyî li dar xistin.
Bi hezaran şêniyên bajarê Dêrikê yê kantona Cizîrê ya Rojavayê Kurdistanê bi boneya “1’ê Sibatê Roja Piştevaniya Rojava ya Cîhanî” û bilindkirina berxwedanê meşek girseyî li dar xistin. Saziyên civakî, partiyên siyasî, di heman demê de hemû şêniyên bajêr û gundewarên Dêrikê beşdarî meşê bûn.
Meş ji Qada Azadî bi diruşmeya ‘Bijî berxwedana şervanan û Yekîtiya Gelê Kurd’ dest pê kir û li navenda ciwanan veguherî mîtîng.
‘1‘ê Sibatê di dîrokê de hat qeydkirin’
Di destpêka mîtîngê de her kes deqeyek rêzgirtin li ser giyanê şehîdan rawestiyan, paşê li ser navê Tevgera Civaka Demokrat Ebduselam Ehmed axivî û wiha got: “Bi navê gelê Dêrikê em şehîdên her çar parçeyên Kurdistanê bibîr tînin, ew bûn nimûne di cîhanê de ku bi saya wan gelê kurd hemû bûn yek. Tê dîtin ku çawa pilanên qirêj li ser gelê kurd pêk hatin û xwestin komkujiyan li ser wan de pêk bînin. Hemû dewletên derdorê xwestin îradeya gelê kurd bişkînin, lê gelê kurd li her çar parçeyên Kurdistanê û li ewropa xwe isbat kirin bi îradeya xwe ya xurt. Bi hezarên salan pilan û xefik li ser gelê kurd dimeşandin, lê 1‘ê Sibatê di dîrokê de hat qeydkirin ku gelê kurd yeke û wê mafê xwe biparêze û şoreşa xwe bilind bike, em ê berxwedana xwe misoger bikin û xwedî li axa xwe derkevin, ji ber ku em gelekî aştî xwazin.”
‘Em şenslîne ku me îro yekîtiya kurdan dît’
Di berdewamiya mîtîngê de li ser navê qenala Kurdistan a Başûrê Kurdistanê Zana axivî û wiha got: “Gelê me yê
berxwedêr ev çend rojin ez ji Silêmaniyê hatime û bi hezaran silav û hestên gelê wir ji bo we bi xwe re aniye. Bila gelê Rojavayê Kurdistanê baş bizanibe ku rih û canê me li gel weye, em şenslîne ku me îro yekîtiya kurdan dît. Tu carî nehizirin ku hûn bi tenê ne, heger pêwîstî hebe em ê ji şûna kamîre û mayîk çekan hilgirin û li kêlek şervanên xwe di çeperan de şer bikin.”
Meş jî bi moral û hestekî bilind bidawî bû.
