Ayşa Silêman/ Dêrik
Jinên bajarê Dêrik, Girkê Legê û Çilaxa bi dirûşma ‘Jin, Jiyan, Azad’ mitîngeke girseyî li bajarê Girkê Legê lidar xistin.
Kongra Star ji bo piştgiriya meşa cîhanî ya ku ji aliyê înîsiyatîfa “Jin Rojava Diparêzin” ve hatiye organîzekirin ku armanca wê parastina şoreşa jinan û piştgiriya berxwedanê ye, mitîngeke hevgirtinê li dar xist. Mitîng li bajarê Girkê Legê bi beşdariya jinên ji Dêrik, Girkê Legê û Çilaxa helwestek yekgirtî di parastina destkeftiyên Şoreşa Rojava de hate piştrastkirin.
Di destpêka mitîngê de hemû hazir xulek bêdeng li ser giyanê şehîdan rawestiyan, paşê Li ser navê Kongra Star Emîna Omer axivî û wiha got: “Em Kongra Star di bin dirûşmeya ‘Îradeya jin em şoreşa hebûnê diparêzin’ em piştgiriya kampaniya jin a Navnetewî ya ku `Jin Rojava diparêzin` dikin. Ji ber ku baweriya me ya xurt heye ku jin guhertinê çêdikin û ew cewherê demokratiyê ne. Lewma ev kampanî li ser asta cîhanê dest pê dike ku hemû jin tevlî wê dibin ji bo piştgiriya destkeftiyên jinê. Em jî wek Kongra Star bi hemû rêxistinên xwe tevlî vê kampaniyê dibin ji ber ku kampanî ji bo parastina Şoreşa Jinê ye.
Ev meheke bi êş bû li ser gelê Kurd ku li seranserî cîhanê xwe kirin yek û êriş li ser gelê Kurd pêk anîn, xwestin îrade û projeya Netewa Demokrat bişkînin û hebûna gelê Kurd ji holê rakin. Ev êriş ji Şêxmeqsûd dest pê kir heya gihişt herêma Bakur û Rojhilatê Sûriyê, niha jî bajarê Kobanê kirine dorpêcê de û dixwazin berxwedaniya wan têk bibe, di encamê de gelek zarokên bê guneh jiyana xwe ji dest dan. Hemû cûreyên hovîtiyê li ser me pêk tînin û dixwazin vîna me bişkînin lê bila baş bizanin gelê ku ev 15 salan têkoşîn kirî wê tu carî paş de neçe û wê hertim serkeftin ya me bê.”
