Solîn Mihemed/ Qamişlo
Bi beşdariya jinên ji bajarên Qamişlo, Amûdê, Dirbêsiyê û Tirbespiyê Kongra Star li bajarê Qamişlo çalakiyeke pirotestoyê lidar xist û tê de tekez kir ku wê tu hêz nikaribe îradeya jina azad bişkîne.
Îro, Kogra Star çalakiya protêstoyê li ber Çerxerêya Darê ya nêzîkî Stadyoma 12’ê Adarê ya li bajarê Qamişlo lidarxist. Di çalakiyê de li ser banga kampanyaya “Jin Rojava Diparêzin”, jinên ji bajarên Qamişlo, Amûdê, Dirbêsiyê û Tirbespiyê hazir bûn. Beşdaran piştgiriya xwe ji bo meşa navneteweyî ya bi armanca parastina destkeftiyên şoreşa jinan û hevgirtina xwe bi berxwedana Rojavayê Kurdistanê re tekez kirin.
Di destpêka çalakiyê de deqeyek rêzgirtin li ser giyanê şehîdan hat rawestandin.
Piştire rêveberiya Kongra Star Rîhan Loqo axivî û wiha got: “Ji qada jina azad û ji qadên şoreşa jinê em berxwedana Hêzên Parastina Jin YPJ’ ê ku bê navber li hember dagirkeriyê, qirkirin û desthilatdariyê li ber xwe dan silav dikin û em dibêjin bijî berxwedana YPJ’ê. Bi navê tevahî jinên azadîxwaz û jinên ku di tevahî qadên têkoşîna jin, qadên şoreşa jin û qadên berxwedan û rûmetê de ku bê navber li hember hişmendiyên dagirker ku dixwazin dîroka jinan tune bikin, berxwedana YPJ’ê silav dikin. Jinên Kurd bi çirûska yekê li hember van hişmendiyan bi cesaret û bi rihê felsefeya ‘Jin Jiyan Azadî’ bi berxwedaniyeke mezin derketin qadan û bi dengekî bilind felsefeya jinê bilind kirin û gotin, ” Wê sedsala 21’an sedsala jinan be.”. Ev sîstema ku jinan pêşengtiya wê kir di aliyên siyasî, leşkerî, civakî û îdarî de bûn nimûneyek ji bo tevahî Cîhanê.”
Rîhan Loqo axaftina xwe wiha bi dawî kir: “Pêl bi pêl şoreşa jinan di asta navnetewî de hate xuyakirin. Di heman demê de têkoşîna jinên Suriyan, Ermen, Ereb, Êzîdî û Kurd êdî bû hevgirtineke jinan li beramberî sedsala ku dixwazin jinan tune bikin, jinan yekîtiya xwe ava kirin û li hemberî sîstema dagirkeran ku xwestin îradeya me tune bikin lê nikarîbûn hebûna me tune bikin. Îro tê diyarkirin ku sîstemên dagirker li dijî hebûn û sîstema jinên azad in. Herwiha îro civakeke heye ku jin pêşengtiya wê dike, ne bi topên wan û ne jî bi hişmendiya wan nikarin îradeya jina azad bişkînin. Êrişên wan li dijî nasnameya jinan û ji bo qirkirina jinan e, lewma jî qirkirina li ser gelê Kurd qirkirina li ser jinên Kurd e, lê li hember vê em wek Kurd û Jinên Kurd tucarî li hember van êrişan nayên şikandin.”
