Navenda Nûçeyan
Xelkê gundê Metîna yê li rojhilatê bajarê Kobanî û ciwanên bajarê Hesekê dest bi amadekariyên xweparastinê li dijî êrîşên komên çete yên girêdayê dewleta Tirkiyeyê kiriye.
Êrîşên komên paramîlîter ên ku ji aliyê Tirkiyeyê ve tên piştgirîkirin û HTŞ’ê li dijî Bakur û Rojhilatê Sûriyeyê bênavber berdewam dikin. Êrîş û hewldanên dorpêçkirina Kobanî yê li Kantona Firatê zêde bûne. Li gorî agahiyan, di navbera bajarokê Eyn Îsa û gundê Ebû Sîra yê li nêzî Kobanî de di navbera komên paramîlîter ên Tirkiyeyê û şervanên QSD û YPJ’ê de şerên dijwar diqewimin. Tê ragihandin ku şerên li herêmê dem dem zêde dibin.
Li ser gefên êrîşê, ciwan û gundiyên gundê Metîna yê li rojhilatê bajarê Kobanî dest bi amadekariyên xweparastinê kirine. Xelkê Metîna, ji bo parastina gund û cihên jiyanê, xwe çekdar kirine da ku mafê xwe yê parastina xwe bi kar bînin.
Heman demê de li bajarê hesekê jî hijmarek Ciwan ji bo parastina heremê bi daxuyaniyeke ragihandin û gotin” em heta dawiyê amadene ji bo parastina axa xwe, me tu carî li hemberî dijmin serî netewandiye û emê netewînin jî.”
Ciwanan bang li tevahî ciwanên heremê kirin ku her “kesê xwedî rumet ji bo parastina welat di nav têkoşînê de be”.
