Navenda Nûçeyan
Komên çete yên girêdayî hikûmeta demkî ya Suriyeyê û dewleta Tirk a dagirker, li taxên Şêxmeqsûd, Eşrefiye û Benî Zêd li kêleka revandin û qetilkirina mal û milkê welatiyan talan dikin.
Taxên Şêxmeqsûd, Eşrefiye û Benî Zêd ên Helebê di navbera 6 û 10’ê Çileyê (2025) de bûn hedefa êrişên dijwar ên komên çete yên girêdayî hikûmeta demkî ya Suriye û dewleta Tirk. Di êrişên ku bi tang, top, balafir û hemû cureyên çekên giran pêk hatin de, komkujî hatin pêkanîn, gelek kes hatin revandin û bi deh hezaran kes koçber bûn.
Li gorî Nûçeyên ANHA yê li ku çavkaniya xwe ji Ofîsa Koordînasyona Alîkariya Mirovî (OCHA) ya Neteweyên Yekbûyî (NY) digre, herî kêm 120,000 kes ji taxên Şêxmeqsûd, Eşrefiye û Benî Zeyd koçber bûne, zêdetirî 500 kes jî winda ne.
Ji ber ku destûra derbasbûna rojnamevan û saziyên mafên mirovan a ji bo taxan nayê dayîn, agahiyên zelal nehatine bidestxistin. Lê li gorî çavkaniyên li herêmê komên çete yên bi navê Firqeya Hemze, Firqeya Emşat, Nûreddîn Zengî, Firqeya Sultan Murad û hwd. piştî komkujiyan, welatiyên li taxan mane kom dikin, heqaretê li wan dikin, direvin.
Çavkaniyan ragihandin ku li taxa Eşrefiyê hejmarek şêniyên eKurd di serdegirtinên malan ên ku hîn jî didomin de hatine revandin û birine cihên nediyar.
Çeteyan dest bi talanê kirine
Li gorî Rêxistina Mafên Mirovan a Efrînê, çeteyan li nava kolanan dest bi talankirina mal û milkê xelkê taxan kiriye. Talankirin li gelek kolanên Şêxmeqsûdê, bi taybetî Kolana 20’an a li nêzî çerxerêya Şehîd Kolî, Kolana Badîno, Kolana 15 û kolana li hember Ofîsa Îstîxbaratê ya Şekato tê kirin. Hat gotin ku çete dikevin dikanan û hemû tiştên hundir ên weke mobîlya, alavên ceyranê û hemû tiştên din talan dikin.
Navenda tenduristiyê hat xirakirin
Li gel êriş û talankirinên komên çeteyan, li taxan pirsgirêka ceyran û tenduristiyê jî di asta jor de ye. Hat ragihandin ku ceyran rojê tenê 2 saetan tê dayîn, gelek navendên tenduristiyê hatine xirabkirin.
