Ayşa Silêman/ Dêrik
Şêniyên bajarê Dêrikê û gundewarên wê ji bo xurtkirina îradeya gelê Şêxmeqsûd û Eşrefiyê bi dirûşmeyên ‘Bijî berxwedana gelê Kurd, Berxwedan jiyane’ meşeke girseyî li darxistin.
Şêniyên bajarê Dêrikê û gundewarên wê ji bo xurtkirina îradeya gelê Şêxmeqsûd û Eşrefiyê bi dirûşmeyên ‘Bijî berxwedana gelê Kurd, Berxwedan jiyane’ meşeke girseyî li darxistin. Di meşê de hemû endamên saziyên Rêveberiya Xweser, şêniyên bajêr, xwendekar û mamoste hazir bûn.
Meş ji Qada Azadî dest pê kir û li nîva bazara bajarê Dêrikê veguherî mîtîng.
Di destpêka mîtîngê de hemû hazir xulek bêdeng li ser giyanê şehîdan rawestiyan, paşê li ser navê Partiya Yekîtiya Demokrat PYD’ê li bajarê Dêrikê Ciwan Hesen axivî û wiha got: “Li ser navê PYD’ê û bi dirûşmeya ‘Bi rihê qehremantî û berxwedaniya Şêxmeqsûd û Eşrefiyê em ê azdiya gelan misoger bikin’ em xwedî derketina we silav dikin. Em şehîdên Şêxmeqsûd û hemû şehîdên Şoreşa Rojava bibîr tînin û em radighînin ku bîranîna şehîdan banga serkeftinê ye. Kiryar û komkujiyên ku li Şêxmeqsûd rû dayîn û dîmenên ku gelê kurd bi çavan didîtin, hestên gelê kurd û dilê wan hemûyan ji bo gelê wir lê dida. Ji bo vê yekê dema em dibêjin kurd berxwedanî tê bîra me, dibêjin Kurdistan welatê ku xwîn têde ne rijaye. Lê gelê me di dîrokê de heye roja îro rastî binpêkirin, qirkirin û komkujiyan tê. Lê li kêleka wê kelha berxwedanê ji dîrokê heya roja îro bi tîpên zêrîn navên keçên me yên kezî zer û kurên me yên simbêl sor bi lehengî heya îro dinivîse. Welatên derdorê ji bo kiryarên ku diqewimin bê dengin û her kes çavê xwe ji komkujiyên ku rû didin digrin, em niha tekez dikin ku kes alîgirê kurdan nîne. Ji bo vê yekê şiyar bin gelê kurd û peyama fermandar Ziyad baş fam bikin. Hevalên me yên Şêxmeqsûdê mesacekî didin me û dibêjin gelê kurd bibin yek, ji bilî yekîtiya we tucarî çareserî nîne. Ji bo vê yekê banga me ji hemû hêz û tevgerên kurd re û ji kurdên ku li seranserî cîhanê jiyan dikin, bila destê xwe deyînin li ser wijdanê xwe û rastiya berxwedanî û şehadeta heval Ziyad û hevalên wî nas bikin. Em bi yek dengî dibêjin heval Ziyad ku gelê me bi yek rihî mesaca te pêşwazî kir û li her derî rabû ser piyan û bang dikin berxwedan jiyane.”
Meş bi dirûşmeya ‘Bi Rihê berxwedaniya Şêxmeqsûd û Eşrefiyê em ê azadiya gelan misoger bikin’ bidawî bû.
