Navenda Nûçeyan
Li kantona Cizîrê meşeke girseyî di bin dirûşmeya “Bi rihê qehremantiya Şêxmeqsûd û Eşrefiyê em azadiya gelan misoger bikin” komkujiyên li dijî taxên Şêxmeqsûd û Eşrefiyê ku ji aliyê hikumeta demkî pêk hatin, li bajarê Qamişlo û Dêrikê hatin şermezarkirin, herwiha ev meş bi hemdemiya merasîma Şehîd Ziyad Heleb û şehîdên ku li bajarê Kobanê hatin oxirkirin, hat lidarxistin.
Bi armanca şermezarkirina komkujiyên çeteyên hikumeta demkî li dijî taxên Helebê Şêxmeqsûd û Eşrefiyê, herwiha bi hemdemiya merasîma Şehîd Ziyad Heleb û şehîdên ku li bajarê Kobanê hatin oxirkirin, bi hezaran şêniyên Amûdê, Tirbêspiyê, Tilhemîs û Qamişlo, endamên Saziyên Rêveberiya Xweser, Saziyên Civaka Sivîl û bi sedan endamên Hêzên Ewlekariya Hundirîn di bin dirûşmeya “Bi rihê qehremantiya Şêxmeqsûd û Eşrefiyê em azadiya gelan misoger bikin” ji ba çarxerêya Osman Sebrî ya bajarê Qamişlo meşiyan.
Meş bi rawestandina deqeyeke rêzgirtin li ser giyanê pekrewanan, li çarxerêya şehîd Rûbar veguherî mitîngê. Piştî ku meş veguherî mitîngê axaftina şehîd Ziyad Heleb hat guhdarkirin, paşê li ser navê Meclisa Malbatên Şehîdan a bajarê Qamişlo Mahsûm Hesen axivî û wiha got: “Ez di şexsê şehîd Ziyad Heleb hemû şehîdên rûmetê bi bîr tînim û bejna xwe li hemberî wan ditewînin. Îro gelê me di kêliyên dîrokî re derbas dibin ku şerekî cîhanî yê sêyemîn li ser erdnîgariya Kurdistanê tê kirin. Qedera gelan di vî şerî de tê nivîsandin, lê gelê ku li ber xwe bide ew ê çarenûsa xwe diyar bike. Bê guman berxwedana dîrokî ya ku li Şêxmeqsûd û Eşrefiyê ya ku di kesayeta şehîd Ziyad û rêhevalên wî de hate raberkirin, destkeftiyên mezin pêk anîn. Rûxmî ku li ser ragihandinên dijber şerekî taybet hat meşandin ku hemû sûcên çeteyan dihat veşartin û gotin Şêxmeqsûd û Eşrefiyê ket, lê hêz û gelêm me di wan her du taxên biçûk de, tanko û topên hêzên mezin ên ku piştgiriya wan çeteyan dikir, têk birin û serkeftin bi xwîna xwe tacîdar kirin.”
Di meşa li bajarê Dêrikê jî gel, endamên saziyên Rêveberiya Xweser, xwendekar, mamoste û Hêzên Ewlekariya Hundirîn beşdar bûn. Meş ji Qada azadî bi siloganên ‘Şehîd Namirin, Berxwedan Jiyane’ dest pê kir û li Navenda Ciwanan veguherîn mîtîng. Tê de jî li ser navê Rêxistina Herêma Cizîrê Mihemed Ebdurhîm axivî û wiha got: “Di şexsê şehîdên Şêxmeqsûd û Eşrefiyê de em bejna xwe ditewînin, di van her du taxan de destanên lehengiyê hatin nivîsandin û dîrokeke nû hat nivîsandin. Li hevhatinên ku hatîn kirin li ser Şêxmeqsûd têk çûn û komên çete bi bi binketin, yên ku bi serketin û biryara têkoşîn û berxwedanên dan Şehîdên me yên qehremanin. Van herdu taxan li dijî 42 hezar çeteyan li berxwedan ne hikumeta demkî ne jî çeteyên girêdayî dagirkeriya Tirk dikarî îradeya wan bişkîne. Tevî hemû komkujî û kiryarên ku li wir rûdidan hemû cîhanê xwe bêdeng kir bi taybet hêzê netewî, armanca wan ji bêdengiyê ew bû ku gelê Şêxmeqsûd xwe teslîm bikin û bê îrade bimînin û van çeteyên hov li ser me ferz bikin û dixwest şerekî nav xweyî di nav herêmên me de derxe û aramî û aşîtiya ku hatî avakirin hilweşîne. Lê biryara Şehîd Ziyan û Denîz ku barê lehengiyê bigrin ser milê xwe pilanên dijmin têk birin, ji wan re isbat kirin ku ne em in yên ku teslîmkariyê qebûl dikin. Dixwazin hebûna me ji holê rakin lê bi yekîtiya gelê kurd û destek dayîna herçar parçeyên Kurdistanê em ê biser bikevin û bigihêjin aştî û aramiyê.”
