Stêrk Mihemed/Qamişlo
Kerwanên gelê kantona Cizîrî yên ku berê xwe dane Helebê diyar kirin ku ew ji bo banga seferberiya ku Hêza Ewlekariya Hundirîn û gelê Şêxmeqsûd û Eşrefiyê îlankirine diçin û wê bibin palpişt ji vê bangê re.
Îro û di seatên sibehê de gelê Kantona Cizirê li Qamişlo kombûn da ku berê xwe bidin Helebê. Gelê Efrînê û Kantona Cizîrê banga seferberiyê ku Hêza Ewlekariya Hundirîn û gelê Şêxmeqsûd û Eşrefiyê kirine xwe berpirsyariyê pêkanîna wê bangê dîtin û berê xwe dan Helebê. Herwiha duh jî kerwanên gel ji kantona Firatê ji bo piştgiriya seferberiyê berê xwe dan Helebê.
‘Me berê xwe daye Helebê’
Şêrîn Reşîd diyar kir ku divê tevahî gelê Kurd yê li cîhanê tevlî berxwedaniya Şêxmeqsûd û Eşrefiyê bibin û wiha got: “Ji 6’ê Çile de êrişeke hovane ji aliyê hikumeta demkî ve li ser taxa şêxmeqsûd û Eşrefiyê yê Helebê pêk hat, em jî weke gelê Efrînê yê li Kontona Cizîrê li gorî derfetê heyî hewildidin ku xwe bi gelê xwe gihînin û em xwe berpirsyar dibînin. Me berê xwe daye Helebê da ku em li kêleka gelê Şêxmeqsûd û Eşrefiyê bisekinin herwiha banga me ji hemû gelê Kurd yê li Ewropa re, ji Rêxistinên mirovî û SPT re ku xwedî li vê gelî derbikevin, vê hovîtî û komkujiya di mafê gelê Kurd de tê kirin were seknandin.”
‘‘Emê bibin palpişt ji Şêxmeqsûd û Eşrefiyê re’’
Mehsûm Hesen da zanîn ku berxwedana Şêxmeqsûd û Eşrefiyê di dîrokê de hat nivîsandin û wiha pê de çû: “Em weke gelê kantona Cizirê êrişên li ser Şêxmeqsûd û Eşrefiyê şermezar dikin û ji bo em li kêleka gelê xwe bisekirin me berê xwe daye Helebê. Emê ji tevhî cîhanê re isbat bikin ku em gelê Kurd yekin û emê bibin palpişt ji Şêxmeqsûd û Eşrefiyê re. Emê bi rêkevin û biçin Helebê û bi gelê xwe re berxwedaniyê bimeşînin, heya ku Sûriyek ewle û demokratîk çêdibe.”
‘‘Berxwedanî û êşa Şêxmeqsûd û Eşrefiyê yê tevahî Kurda ye’’
Perwîn Cemîl destnîşan kir ku ew ji wê siharê de li ser piyane û xwe amade dikin ji bo biçin piştgiriya gelê xwe
bikin û wiha got: “Komkujî li Şêxmeqsûd û Eşrefiyê tên kirin, em ji weke gelê Sûriyê vê yekê qebûlnakin, îro li Sûriyê gelê Sûrî tên tunekirin. Xwe weke berpirsyar û hikumetek Sûrî nîşan didin, lê kêleka wê gelê xwe dikujin em vê yakê qebûlnakin. Ji ber vê yekê me berê xwe daye Helebê ji bo piştgiriya gelê Şêxmeqsûd û Eşrefiyê bikin, ji ber ku êşa me yeke. Berxwedanî û êşa Şêxmeqsûd û Eşrefiyê yê tevahî Kurda ye, ez weke jinek Kurd berê xwe didim Helebê ji bo bibin piştevaniya gelê xwe.”
‘‘Çiqas dûr bi emê xwe bighînin gelê xwe’’
Şikriye Mehmûd anî ziman ku ew diçin piştgiriyê û wiha pê de çû: “Heya em saxbin û dilopek xwîn di cane me de hebe, emê piştgiriya gelê Şêzmeqsûd û Eşrefiyê bikin. Li ku derê dibe, bila bibe û çiqas ji me dûr be, emê bi hewara gelê xwe re bin û emê berxwedaniyê bi wan re berdewam bikin.
‘Ji bo banaga seferberiyê’
Wijdan Elhese daxuyakirin ku ew ji bo banga seferberiya gelê Şêxmeqsûd û Eşrefiyê diçin û wiha got: “Her mirovek xwedî pîvan û wijdan ji bo gelê şêxmeqsûd û Eşrefiyê divê rabin ser piyan û piştgiriya gel bike. Îro jî em li
vê derê ne û em berê xwe didin Helebê ji bo banaga gelê Şêxmeqsûd û Eşrefiyê.”
