Navenda Nûçeyan
Ji fermandarê QSD’ê Sîpan Hemo diyar kir ku ew destekê didin daxuyaniya Meclisa Gel a Taxên Şêxmeqsud û Eşrefiyê û tişta ji destê wan were ew ê weke alîkarî bikin.
Endamê Fermandariya Giştî ya QSD’ê Sîpan Hemo, têkildarî êrişên li ser taxên Şêxmeqsud û Eşrefiyê û berxwedana li dijî van êrişan, peyamek bi dîmen weşand.
Sîpan Hemo, da zanîn ku ji 5’ê Çileyê ve li ser Şêxmeqsud û Eşrefiyê êriş pêk tên û got: “Herdu tax biyaniyên van êrişan nîn in, lê vê carê êrişek pir hovane heye.”
Sîpan Hemo destnîşan kir ku dinya van êrişan ji nedîtî ve tê û bêdengî şermezar kir.
‘Em bawer dıkın ku dê serkeftın a gel be’
Hemo diyar kir ku berxwedan li Şêxmeqsud û Eşrefiyê bûye çandek û got: “Dema dibêjin Eşrefiye û Şêxmeqsud tenê berxwedanî tê bîra mirov. Em bawer dikin gelê Şêxmeqsud û Eşrefiyê wê di vê berxwedana xwe de jî hemû planên dijminan têk bibin, wê serkeftinê bikin aydê xwe û ya gelê Kurd.”
Fermandar Sîpan Hemo, bibîr xist ku wan weke QSD’ê di çarçoveya Peymana 1’ê Nîsanê (2025) de hêzên xwe ji herdu taxan kişandine û wiha dom kir: “Li wir meclisa taxan û Hêzên Ewlekariya Hundirîn ewlekariyan taxan digirin.”
Sîpan Hemo anî ziman ku Meclisa Gel a Taxên Şêxmeqsud û Eşrefiyê îro (9 Çile) bi daxuyaniyekê eşkere kirine ku ew ê berxwedan û sekna xwe ya rûmetê bidomînin. Hemo diyar kir ku ew piştgiriyê didin daxuyaniya meclisê û wiha dom kir: “Ji destê me were, emê alîkariya wan bikin. Mafê tu kesî nîn e ku gelê Şêxmeqsud û Eşrefiyê ji cihê wan derxîne. Gel wê li taxên xwe xwedî derkevin û planên dijmin têk bibin. Ez tevahî şervanên li çeperan şer dikin û sekna gelê Şêxmeqsud û Eşrefiyê silav dikim. Em dibêjin ku ev berxwedan wê biser bikeve.”
