Navenda Nûçeyan
Bi dehan gelên herêma Firatê îro ber bi taxên Şêxmeqsûd û Eşrefiyê yên li Helebê ve çûn, ji bo piştgirî û hevgirtina bi berxwedana dîrokî ya li wir pêk tê û di bersiva seferberiya giştî ya li her du taxan de hatiye ragihandin.
Gelê ku wê here di saetên nîvroj de beriya ku bi kerwanan derkevin li qada Şehîd Egîd ya bajarê Kobanê kom bûn. Gelê Kobanê bi rihê berxwedan û serkeftina Kobanê xwe amade kirin û bi rê ketin.
Di vê derbarê de hemwelatiyê bi navê Osman Îme ku yek ji beşdaran e wiha ji Rojnameya me re got: “Ji bo piştgiriya berxwedana gel a ku li wir diqewime û di bersiva banga giştî ya çekan a ku ji bo her du taxan hatiye ragihandin de, em ê ji keleha berxwedanê ber bi Şêxmeqsûd û Eşrefiyê ve biçin, da ku bi ruh û beden piştgiriyê bidin wan.
Çawa ku Kobanê û Bendava Tişrîn bi saya îradeya gelên berxwedêr û têkoşer ên herêmê li ser piyan man, ev tax jî bi saya yekîtiya gelên xwe û hevgirtina hemû pêkhateyên Bakur û Rojhilatê Sûriyeyê bi wan re wê li ser piyan bimînin.”
Her wiha lê zêde kir ku beşdarbûna di van karwanan de ku erkek exlaqî û mirovî ye ku li ser hemû Sûriyan e, û tekez kir ku bi hevgirtinê û rihê şoreşger ê gelêrî, ew ê bê guman bi ser bikevin.
Beşdaran destnîşan kirin ku ev gav yekîtiya gelên Bakur û Rojhilatê Sûriyeyê nîşan dide. Her wiha peyameke zelal a hevgirtinê ye ku berxwedana Şêx Meqsûd û Eşrefiyê berdewamiya têkoşîneke yekane ye ku sernavê wê rûmet û jiyana hevbeş e, û redkirineke tund a hemû binpêkirin û êrişên ku hebûna gelê Kurd û nirxên wan hedef digirin nîşan dide.
