Navenda Nûça
KNK’ê daxuyand ku êrişên li ser Şêxmeqsûd û Eşrefiyê ji bo têkbirina hewldanên çareseriyê ne û diyar kir “Em bang li hemû hêzên Kurdistanê û hemû kurdistaniyan dikin û dibêjin bi rihê berxwedana Kobanê li destkeftiyên Rojava xwedî derkevin û cihê xwe li gel Rêveberiya Xweser bigirin.”
Konseya Rêveber a Kongreya Neteweyî ya Kurdistanê (KNK) têkildarî êrişên çeteyan ên li ser taxên Şêxmeqsûd û Eşrefiyê yên Helebê daxuyaniyek da.
Daxuyanî wiha ye:
“Ev 3 roj e li Halebê û derdora wê, li ser deverên Kurdan êriş pêk tên. Dema ku heyeta QSD’ê jibo hevdîtinên çareseriyê çû Şamê, hinek hêz li Helebê ketin nava liv û tevgerê û êrişî deverên Kurdan kir. Ev biryar û ev êriş ne tesedûf in û ji bo têkbirina hevdîtinan in. Ev biryar li Tirkiyeyê hatiye dayîn û bi destê hêzên girêdayî Tirkiyeyê têne kirin. Amanca van êrişan ew e ku çareseriyeke aştiyane pêk neyê û li Sûriyeyê Kurd nebin xwedî statu.
Dema ku di navbera Rêveberiya Xweser û desthilata Şamê de hevdîtin pêk tên û teref nîzîngê hev dibin, ev êriş têne tekrarkirin. Vê carê jî tam dema her kes hêviya lihevhatinekê bû, dîsa hêzên li dijî aştî û çareseriyê, ketin hereketê û şer derxistin. Jixwe van rojan rayedarên dewleta Tirk yek yek derdikevin û Kurdên Rojavayê Kurdistanê tehdît dikin. Li vê derê û aşkera ye yên ku Sûriyeyê tevlihev dikin dewleta Tirk û hêzên girêdayî wê ne. Pêwîst e reya giştî û hêzên peywendîdar vê rastiyê bibînin û li gorî vê rastiyê jî tedbîran bigirin.
Li Helebê li taxên Şêxmeqsûd û Eşrefiyê ku du taxên Kurdnişîn in, ev tax bi tankan û bi hemî çekên giran hatine dorpêçkirin û êriş berdewam in. Di van êrişan da jin, zarok jî di navde hemî niştecî û dibistan, nexweşxane û hemî avahî têne hedefgirtin. Di êrişan da jin û zarok jî di navde heta niha derorê deh kesan jiyana xw ji destdane û dehan jî birîndar hene. Li van taxan elektrîk û av hatine qutkirin û derbazkirina pêdiviyên weke derman û xwarinê jî hatine astengkirin. Li Helebê li deverên Kurdan krîzeke mirovahiyê heye.
Pêwîst e li pêşiya her kesî rêveberiya Şamê xwedî li erkên xwe derkeve, van hêzan kontrol bike û li gorî peymanê tev bigere.
Li ser vê di sêrî de em bang li Neteweyên Yekbûyî û hemî hêzên peywendîdar dikin ku ji rewşê re çavên xwe negirin û di zûtirîn demê de bikevin nava tevgerê û van êrişan bidin rawestandin.
Di heman demê de em bang li raya giştî ya cîhanê û dostên gelê Kurd dikin ku Kurdên Rojava tenê nehêlin û piştgiriya gelê Kurd bikin.
Her wiha em bang li hemû hêzên Kurdistan û hemû kurdistaniyan dikin û dibêjin bi rihê berxwedana Kobanê li destkeftiyên Rojava derkevin û cihê xwe li gel Rêveberiya Xweser bigirin.
Bi vê munasebetê em wek KNK, êrişên li ser gelê Kurd yên li wan deveran bi tundî şermezar dikin û dibêjin em bi her awayî li gel Rêveberiya Xweser in û em ê destkeftiyên Kurdan biparêzin.
Di heman demê de em ji kesên jiyana xwe ji destdayî re rehmetê, ji malbat û ji hemû gelê Kurdistanê re sersaxiyê, ji birîndaran re şifayê dixwazin.
Xwedîderketina li Rojava xwedîderketina i Kurdistanê ye.”
