Ronahî Sadûn/Qamişlo
Meclisa Jin a PYD’ê bi daxuyaniyeke nivîskî êrişên sîstematîk ên li ser taxên Şêxmeqsûd û Eşrefiyê yên li Helebê ji aliyê komên girêdayî hikumeta veguhêz ve, şermezar kir û tê de pabendbûna xwe ya ji bo parastina mafên sivîl û jinan piştrast kir.
Meclisa Jin a Partiya Yekîtiya Demokratîk (PYD) li navenda xwe ya bajarê Qamişlo bi daxuyaniyekê êrişên li ser taxên Şêxmeqsûd û Eşrefiyê yên li Helebê û binpêkirinên giran ên li dijî sivîlan, bi taybetî jin, zarok û malbatên ewle, yên ji aliyê komên girêdayî hikumeta veguhêz ve tên kirin, şermezar kir. Daxuyanî bi zimanê Erebî ji aliyê endama Meclisa Jin a PYD’ê Hayîstan Hesen û bi zimanê Kurdî ji aliyê hevseroka PYD’ê ya Girkê Legê Şehnaz Ebdo ve, hat xwendin.
Daxuyanî wiha hat destpêkirin: “Meclisa Jin a Partiya Yekîtiya Demokratîk bi tundî êrişên sîstematîk ên li ser taxa Şêxmeqsûd û Eşrefiyê yên li Helebê û binpêkirinên giran ên li dijî sivîlan, bi taybetî jin, zarok û malbatên ewle, yên ji aliyê komên girêdayî hikumeta demkî ve şermezar dike. Ev êriş binpêkirineke eşkere ya nirx û prensîbên mirovî ne ku bi awayekî eşkere li dijî xwestekên hemû Sûriyan ji bo aştî, aramî û ewlehiyê ne. Em tekez dikin ku tiştê ku diqewime berdewamiya siyasetên tundiyê û dûrxistinê ye ku gefê li aştiya sivîl dixwe. Hem jî her hewldanek rastîn a ji bo çareseriyek aştiyane li Sûriyê têkdibe û astengiya pêkanîna Peymana 10’ê Adarê ye, bi vî awayî bêaramiyê didomîne û êşa sivîlan kûrtir dike.”
Daxuyanî wiha hat domandin: “Meclisa Jin a Partiya Yekîtiya Demokrat şehîdkirina sivîla jin a bi navê Fedwa Mihemed Elkurdî di encama êrişa komên çekdar ên girêdayî hikumeta veguhêz de, şermezar dike û aliyên berpirsiyar ji hêla qanûnî û exlaqî ve bi tevahî berpirsiyarê vê cerîmê dibîne. Daxwaz dike ku li gorî qanûn û pîvanên navneteweyî yên têkildar hesab bidin.
Herwiha meclisê pabendbûna xwe ya ji bo parastina mafên jinan û parastina sivîlan piştrast kir û bang kir ku agirbesteke tavilê û berfireh, rakirina dorpêçê û misogerkirina gihîştina bê asteng ji bo alîkariya mirovî, girtina tedbîrên berbiçav ji bo parastina sivîlan, bi taybetî jin û zarokan, bê kirin.”
Daxuyanî wiha hat bidawîkirin: “Em bang li rêxistinên mirovî, mafên mirovan û jinan, hem yên herêmî û hem jî yên navneteweyî dikin ku ji bo rawestandina binpêkirinan, parastina sivîlan û pêşîgirtina li rijandina xwînê, tedbîrên lezgîn bigirin û zextê bikin. Bêdengiya civaka navneteweyî li hember van sûncan wê dike berpirsiyara van sûncan û nirxên mirovahiyê dixe ceribandinek rastîn.”
