Solîn Mihemed/ Qamişlo
Meclisa Malbatên Şehîdan a bajarê Qamişlo bi daxuyaniyekê êrişa hêzên hikumeta veguhêza a Sûriyê li ser taxên Şêxmeqsûd û Eşrefiyê yên bajarê Helebê bi tundî şermezar kir û wiha got: “Hikumeta Veguhêz a Sûriyê berpirsa van êrişan û bandorên wê yên xeternak e.”
Di 22’ê heyvê de taxên Helebê yên Şêxmeqsûd û Eşrefiyê bi giranî rastî êrişên hikumeta veguhêz hatin. Ji bo şermezarkirina êrişên li ser Şêxmeqsûd û Eşrefiyê Meclisa Malbatên Şehîdan a Bajrê Qamişlo li pekrewangeha şehîd Delîl Saroxan daxuyanîk da. Di daxuyaniyê de Meclisa Malbatên şehîdan ya Efrîn- Şehbayê hazir bûn herwiha daxuyanî ji aliyê xwendekarekê ve bi zimanê Kurdî hat xwendin.
Di destpêka daxuyaniyê de wiha hat gotin: “Em bi tundî êrîşa 22’yê Kanûnê ya komên girêdayî hêzên Hikûmeta Veguhêz li ser taxên Şêxmeqsûd û Eşrefiyê yên bajarê Helebê şermezar dikin. Li wan taxên bi deh hezaran mirovên sivîl hene, êrişên hovane yên bi çekên giran û tankan ji bilî hewldanên komkujî û qirkirinê tu wateyeke din nadin ku di encama van êrîşan de jinek şehîd bû û hejmarek ji sivîlan birîndar bûn. Em dayika bi navê Fedwa Mihemed El Kurdî ya di van êrişên hovane yên çeteyên HTŞ’ê de şehîd bûye bi rêzdarî bi bîr tînin û ji birîndaran re jî şifaya xêrê dixwazin. Li taxên Şêxmeqsûd û Eşrefiyê bi hezaran jin û zarok di bin xeteriyê de ne, Hikumeta Veguhêz a Sûriyeyê berpirsa van êrişan û bandorên wê yên xeternak e, di dema ku pêwîstîyeke cidî bi agirbestê heye.”
Daxuyanî wiha hat berdewam kirin: “Di heman demê da tê zanîn ku ne tesadufe ev êrîş rastî serdana Wezîrê Karên Derve yê Tirkiyeyê Hakan Fîdan ê her roj li hember gelên Bakur û Rojhilatê Sûriyeyê gefan dixwe hatiye. Herwiha ev ne cara yekeme ku êriş li dijî taxên Şêxmeqsûd û Eşrefiyê tên kirin, berê jî binpêkirinên peyman û lihevkirinan çêbûna û ev yek jî ji bilî kûrkirina kaos û krîzên nû tiştekî din bi xwe re nayîne û li hember hewldanên ji bo gihîştina çareseriyek siyasî ya giştî ku li gorî hêviyên hemû Sûriyeyê be, têk bibin. Weke Meclisa Malbatên Şehîdam em wan êrişên hovane û tundrew şermezar dikin. Ji bo parastina gelê xwe em her dem amade ne. Çawa bi salan e li hember her curê êrişan, me berxwedaneke ku li cîhanê deng veda, îro jî em ê bi heman îrade û biryardariyê ji bo parastina gelên xwe, jinan û rûmeta mirovahiyê erka xwe pêk bînin. Dîrok û mirovahî şahid e bê şehîdên me weke şervanên Apoyî çawa destanên qehremaniyê nivîsandine. Em ê jî bi hêza Rêber Apo û şehîdan digirin, mîrasa şehîdan a qehremantiyê û fedaîtiyê berdewam bikin. Bila her kes bizanibe ku bi tu rêbazên hovîtî û komployan tu kes nikare vîna gel bişikîne. Ji bo wê careke din em dibêjin divê hikûmeta veguhêz wan çeteyên xwe bisekinîne, dorpêça li hember taxên me yên Şêxmeqsûd û Eşrefiye rake.
Di dawiya dexuyaniyê de wiha hat gotin: “Wekî erk û berpirsyariya sereke rol û mîsyona avakirina Sûriyeke demokratîk ku temsîla hemû pêkhateyan dike berpirsiyariya hemûyan e, em bang li hemû gelên Sûriyê û hêzên neteweyî dikin ku hewldanên xwe zêde bikin da ku bigihîjin çareseriyeke dadperwer ku dawî li polîtîkayên dehsalan ên çewisandin, dûrxistin û kuştinê bîne, û bi hev re Sûriyeyeke azad, demokratîk û ewle ava bikin. “
