Ayşa Silêman/ Dêrik
Şêniyên bajarê Efrînê û gundewarên wê yên ku li bajarê Dêrikê bi cih dibin yekemîn salvegera koçberkirina ji Şehbayê bibîr anîn û daxwaza vegereke bi ewle û bi rûmet li ser axa xwe, kirin.
Îro şêniyên bajarê Efrîn û gundewarên wê yên ku li bajarê Dêrikê bi cih dibin salvegera koçberkirina ji Şehbayê bibîr anîn, êriş û dagirkirina çeteyan li ser mal û milkên xwe şermezar kirin.
Bi beşdarbûna koçberên Efrînê daxuyanî bi zimanê Kurdî û Erebî li Navenda Ciwanan a bajarê Dêrikê hat xwendin.
Di destpêka daxuyaniyê de wiha hat gotin: “Bi erişên ku li ser gelê Efrîn li Şehba hatin meşandin careke din dijmin bi zihniyeta DAIŞ’ê dixwast li hemberî Tevgera Azadiyê û gelê Efrînê yê welatparêz û azadîxwaz bi kiriyarên qirêj û dijmirovî îradeya wan bişkînin. Piştî dagirkirina Efrînê, bi hazaran şêniyên Efrînê ji malên xwe koçber kirin, dar, mal û milkê li Efrînê şewtandin û bi hazaran jin, ciwan û zarok kuştin, heya roja îro jî bê sînor û li ber çavên cîhanê hamû berhemên axa Efrîn têntalan kirin û dizîn. Piştî 58 rojan berxwedanî şeniyên Efrîn ji herema xwe û axa xwe koçber bûn û li herêma Şehba bị cih bûn.”
Di berdewamiya daxuyaniyê de wiha hat gotin: “Wekî ciwanên Efrînê em ji zaroktiya xwe ve heya roja îro ne carek, ne du, gelek ji me, sê-çar caran koçber bûne. Em bi dengê top û tankan mezin bûnê, lê belê tevî ku Efrîn ji bo me tenê bîranîna zaroktiyê bû û mafê her zarokî ye ku ser axa xwe mezin bibe me ev yek jiyan nekir, em di nav têkoşîn û kedê de bûn da ku vegerin Efrînê. Di nav heft salên berxwedaniyê tevî hamû zehmetiyên ku gelê me li herêma Şehbayê dikşandin, tevî dorpêçkirinê û rojan e êrişên çeteyên dewleta Tirk li ser Şehba jî gel li berxwe dida. Di emncama piştgiriya dewleta dagirker ji komên çeteyan ên bi navê El-Emşat, Hamzat û Sûltan Mûrad re bûn sedema koçberiyek duyemîn a gelê Efrîn û Şehbayê.”
Daxuyanî wiha bidawî bû: “Em bang li saziyên mafên mirovan û gelê xwe dikin, bi taybet jin û ciwanan ji bo hamû koçberên li Kurdistan û Sûriyê tekoşîna xwe bilind bikin. Her wiha em bang li gelê xwe dikin ku xwe ji bo vegera girseyî ji bo herêma Efrînê birêxistin bikin û mafê xwe yê rewa yê jiyana bi ewlehî û rûmet li ser axa xwe bidest bixin. Em tekez dikin ku bicihanîna peyama 10’ê Adarê ku vegera kesên koçber û misogerkirina parastina wan destnîşan dike.”
