Lîloz Hisên/Qamişlo
Bi drûşmeya “Tenduristî ne xizmetek e, lê mafeke û parastina mafan bi kesên ku xwedî zanîn û wijdan in dest pê dike” Yekîtiya Dermansazên Qamişlo konferansa xwe ya pêncemîn li dar xist.
Yekîtiya Dermansazên Qamişlo bi drûşmeya “Tenduristî ne xizmetek e, lê mafeke û parastina mafan bi kesên ku xwedî zanîn û wijdan in dest pê dike” konferansa xwe ya pêncemîn li paraka xwendinê ya bajarê Qamişlo li dar xist.
Konferans bi deqeyeke rêzigirtinê destpê kir. Piştre Hevserokê Tevgera Civaka Demokratîk TEV-DEM’ê Ebdulselam Mehmûd axivî û wiha anî ziman: “Di seranserî salên borî de dermansazan berxwedana xwe tekez kirin di riya peydakirina dermanan û pêşkêşkirina rêyên tenduristiyê tevî zehmetî û pirsgirêkên ku herêm tê de derbas bû. Îro jî gaveke din tê avêtin ber bi xurtkirina çavdêriya dermanan li gorî xizmeta civakê.”
Di konferansê de Yekîtiya Dermansazan kar û xebatên xwe yên her du salên borî nîşan dan, herwiha di nav de çalakî, însyatîf û proje jî hatin eşkerekirin. Di heman demê de zehmetiyên ku li hember dermansazan derdikevin, çi li ser asta peydakirina dermanan, kontrolkirina buhayên dermanan an jî xurtkirina çavdêriya dermanan hat nirxandin.
Di konferansê de mudaxele û nêrîn hatin kirin, tê de bal kişandin li ser zehemtiyên ku li hember wan derdikeve. Herwiha hin pêşîniyar û daxwaz hatin kirin weke xebitandina li dermanxaneyan weke sîstema nobetê, destûrdayîn frotina şîrê zarokan tenê li dermanxaneyan û hwd..
Hêjayî gotinê wê di dawiya konferansê de ji bo meclisa nû ya yekîtiyê hilbijartin bê kirin.
