Hêvî Keleş/ Jinwar
Pêşangeha ya hunerên destan li gundê Jinwar cihekî bêhempa ye ku şiyana jinan a veguherandina hunerên destan ji bo çavkaniyek hêz û afirîneriyê nîşan dide. Ew xebatên kolektîf jinan tîne cem hev ku serxwebûna jinan diyar dikin û mîrateyek zindî û nasnameyek hevgirtî nîşan didin.
Jinwar gundekî serbixwe yê jinan li Bakur-Rojhilatê Sûriyeyê ye, wekî cihekî ewle ku jin bikaribin bi hev re bijîn, dûrî tundî û serdestiyê hatiye avakirin û xwe dispêre pergaleke hevkariyê ya li ser bingeha hevgirtin û çalakiya hevbeş. Li gundê jinan Jinwar, ku cihekî aram e û wekî modelek ji bo civatek serbixwe û bi rêberiya jinan di sala 2018”an de hatiye damezrandin, ji dema vekirina gund ve pêşangehek daîmî heye, ku hunerên destan ên ku ji hêla jinên ku bi dilxwazî li wir dijîn ve hatine çêkirin nîşan dide. Li dilê gund, ev pêşangeh wekî beşek yekgirtî ya projeya civakî û çandî radiweste û ji bo jinan platformek domdar ji bo hilberîn, pêşandan û têkiliyê bi hev re peyda dike.
Ev pêşangeh ne çalakiyek demkî ye, lê cihekî daîmî ye di nav Jinwarê de, ku jin berhemên xwe di seranserê salê de nîşan didin. Refên darîn ên sade berhemên ku ahenga di navbera xwezayê û jêhatîbûna destên jinan de nîşan didin, dihewînin û ev berhem beşek ji aboriya gund pêk tînin, ku xwe dispêre xebata kolektîf, hunerên destan ên ku mîrat û xweseriyê nîşan didin.
Pêşangeh cûrbecûr berheman pêşkêş dike, di nav de:
Qutiyên hirî yên bi destan hatine çêkirin, Peykerên seramîk, amûrên bi morîk û xemlên kevneşopî, nakişên Kurdî.
Ev hunerên destan ne tenê berhemên firotanê ne, lê belê dîrokeke hevpar di navbera jinên gund de û bîranîneke kolektîf a ku ji hêla destên ku biryar dane jiyaneke nû li cihekî li ser bingeha hevkariyê û rêzgirtina dualî biafirînin, temsîl dikin.
Aboriyeke femînîst a domdar
Gund modela aboriyek temsîl dike. Jinên Jinwarê bi rêkûpêk bi rêya atolyeyên perwerdehiyê yên navxweyî jêhatiyên xwe pêş dixin û pêşangehên xwe li gorî demsalan û materyalên berdest nûve dikin. Ev xebata berdewam pêşangehê kiriye çavkaniyek aborî ya domdar ku alîkariya jinan dike ku serxwebûna darayî bi dest bixin.
Yek ji jinên ku li pêşangehê dixebitin dibêje: “Em ne tenê berheman nîşan didin, lê di heman demê de çîroka xwe ya xweseriyê jî nîşan didin. Her perçeyek li vir wateyek ji jiyana me hildigire.”
Pencereyek li ser jiyana rojane ya Jinwar
Pêşangeh wekî xalek hevdîtinê di navbera mêvanên gund û niştecihên wê de kar dike. Gelek mêvan tên Jinwarê da ku li ser şêwaza jiyana kevneşopî ya jinan fêr bibin û pêşangeh bi gelemperî rawestgeha wan a yekem e, li wir ew dibînin ka jin çawa xwarin, kelûpelên malê û xemilandinên xwe çêdikin û tenê dema ku bi tevahî pêwîst be xwe dispêrin bazarên derveyî.
Yekkirina mîratê û parastina bîra gelêrî
Bi rêya vê pêşangehê, jinên Jinwarê dixwazin mîrateya Kurdî yên ku windabûnê biparêzin. Neqişandina kevneşopî, seramîk û teknîkên honandina kevnar li vir ne tenê wekî hunereke kevneşopî, lê wekî piştrastkirina berdewamiya çandê tevî zehmetiyan jî têne pratîkkirin.
Têkiliya civakî û peyameke mirovî
Pêşangeh ji rêxistinên civaka sivîl ên femînîst û çandî yên ku bi rêkûpêk serdana gund dikin, piştgiriyek exlaqî werdigire. Hebûna wê ya berdewam peyamek dişîne ku jin dema ku cihek ewle û rêkûpêk peyda bibe, dikarin avahiyên aborî û civakî yên serketî biafirînin. Wekî din, pêşangeh, bi sadebûn û berdewamiya xwe, felsefeya Jinwar a xweserî, parvekirin û hevgirtina femînîst ronî dike.
Pêşangehek ku bi mezinbûna gund re pêş dikeve
Bi demê re, pêşangeh berfireh bû û berhemên nû û rûniştinên belgekirina mîratê jî di nav xwe de girt. Her ku Jinwar wekî civatek jinan a serbixwe mezin dibe, pêşangeh rola xwe wekî platformek ku her tiştê ku jinên wê afirandine û her tiştê ku ew xeyal dikin ku ava bikin nîşan dide, didomîne.
