Esmehan Gedro/Reqa
Zanîngeha El-Şerq ji bo derçûna koma yekem a xwendekarên fakulte û beşên cuda şahiyek li avahiya zanîngehê ya Reqayê li dar xist. Yekem derçûn bi tevlîbûna 129 xwendekaran bi ser ket.
Zanîngeha El-Şerq li kantona Reqayê şahiya derçûna ji bo 129 xwendekarên jin û mêr ji koma yekem a ji fakulte û beşên cuda li avahiya zanîngehê ya li bajêr li dar xist.
Di şahiyê de xwendekarên Zanîngeha El-Şerq û Hevserokên zanîngehê, Hevserokên Zanîngehên Herêma Bakur û Rojhilatê Sûriyeyê, Hevserokên Meclisa Rêveber a Rêveberiya Xweseriya Demokratîk a Herêma Bakur û Rojhilatê Sûriyeyê, Meclisa Rêveber a kantona Reqa û Desteya Çand û Şûnwaran a Bakur û Rojhilatê Sûriyeyê amede bûn.
Şahî bi deqeyeke rêzgirtinê ji bo rêzgirtina giyanê şehîdan dest pê kir, piştre jî xwendekarên derçûnê di dema wergirtina bawernameyan, wêneyên şehîdan hikgirtin û ber bi blatformê ve meşiyan.
Axaftina vekirinê ji aliyê Hevseroka Zanîngeha El Şerq Rena Ebdulqadir bi xêr hatina mêvanan kir û destnîşan kir ku yekemîn derçûna zanîngeha El-Şerq tê kirin, ev yek jî bi bo hemû gelên Bakur û Rojhilatê Sûriyê rojekî dîrokî ye.
Her wiha Hevserokê Meclisa Zanîngehên Bakur û Rojhilatê Sûriyeyê Medya Hemşo xwendekarên derçûyî pîroz kir û got: “Ev roj destpêka bidawîbûna serkeftiyên we ye. Zanîngehên me ne tenê ji bo xwendinê ne, lê belê cihek biçûk a xwenaskirinê ye her wiha cihê fêrbûna azad a riya pêşerojê ye”.
Li ser navê Rêveberiya Xweseriya Demokratîk a Herêma Bakur û Rojhilatê Sûriyeyê jî Hevseroka Meclisa Rêveber Evîn Siwêd axivî û derçûna xwendekaran li wan û kadroyên perwerdeyê yên zanîngehê pîroz kir.
Evîn da zanîn ku Zanîngeha El-Şerq yek ji destkeftiyên şoreşa civakî û demokratîk e ku bi saya fedakariya şehîdan, berxwedana gel û hêzên leşkerî û ewlehî hat avakirin.
Evîn got ji bo piştgiriya saziyên perwerdehî, lêkolîn û pêşxistina asta perwerdehiyê li Herêma Bakur û Rojhilatê Sûriyeyê Rêveberiya Xweseriya Demokratîk pabendî piştgirîdayînê ye.
Her wiha li ser navê Meclisa Xwendekarên Zanîngeha El Şerq, hevserokê Meclisê Omer El Muxtar axivî û bal kişand ser zehmetiyên mezin li pêşiya vî nifşî û got: “Em ji qurbaniyên şer bûn çêkerên hêviyê.”
Piştre xwendekarên derçûyî ji hêla nûnerên deste û saziyên amade ve hatin xelatkirin. Şahî bi gerandina govendan û stranên gelêrî ji hêla beşdar û xwendekaran ve bi dawî bû.
