Dîlan Mulhim\Qamişlo
Nûçegihana ANF’ê Roj Denîz diyar kir ku Ajansa Nûçeyan a Firatê ANF’ê di 26’ê Cotmeha 2005’an de bi armanca ragihandina rastiya gelê Kurd û Kurdistanê ji bo cîhanê, hate avakirin û got, “ANF’ê ragihandina dengê gelê Kurd û Kurdistanê ye”
Ajansa Nûçeyan a Firatê ANF’ê di 26’ê Cotmeha 2005’an de li Ewropayê hate avakirin. Navenda sereke ya Ajansê li Belçîkayê ye û nûçegihanên wê li cîhanê belav bûne. Ajans bi 8 zimanan weşanê dike û li ser asta cîhanî kar û xebatên xwe dide meşandin, lê bi xwe ew Kurdistanî ye. ANF’ê di dîroka ragihandina Bakur û Rojhilatê Sûriyê de jî bi kûrahî cihê xwe girtî ye.
Derbarê salvegera 20’an a damezrandina Ajansa Nûçeyan a Firatê ANF’ê, nûçegihana Ajansa ANF’ê Roj Denîz ji Rojnameya me re axivî.
‘ANF’ê cîhanî ye’
Roj Denîz anî ziman ku Ajansa Nûçeyan a Firatê ANF’ê li ser asta cîhanî xebatê dide meşandin, lê ew Kurdistanî ye û wiha got: “Ajansa Nûçeyan a Firatê ANF’ê di sala 2005’an de bi armanca ragihandina rastiya gelê Kurd û Kurdistanê ji bo cîhanê, hem jî derxistina êş û berxwend wan, êşkerekirina sîstem û işkenceyên ku li ser wan tê meşandin, hate avakirin. Di heman demê de em rastiya çi gelê ku rastî işkence û zordariyan tên, ji raya giştî re radigihînin. Em bi pênûs, kamîre, nûçe û dosyanan rêhevalên civaka xwe ne ku em her tim daxwaz, êş, zehmetî û berxwedaniya gelê xwe ji cîhanê re radigihînin. Bi taybetî daxwazên jinan û berxwedaniya wan a ku li her çar parçeyên Kurdistanê tên meşandin, derdixînin pêş. Ji wê zêdetir li gelek welatan jin bi serhildanan radibin, ji bo vê yekê weke erkî sereke ye ku em van geşedanên ku jin pê radibin bidin pêş.”
‘ANF’ê dengê heqîqetê ye’
Roj Denîz da zanîn ku Ajansa Nûçeyan a Firatê dengê heqîqetê ye û wiha pê de çû: “Em nûçeyan li ser asta Kurdistanî, Rojhilata Navîn û cîhanî dişopînin. Xebatên me ji dema avabûnê û heya niha li ser bingehê dengê heqîqetê berdewam dikin. Dibe ku em heya niha nebibin dengê hemû civakan, lê hewldanên me di vî alî de hene.
Ji bo ku kiryarên li her çar parçeyên Kurdistanê têne kirin, ji raya giştî re were ragihandin, pêwîst e em gavên hîn xurtir bavêjin. Herwiha kiryar û işkencên ku li ser gelê Kurd û li ser asta her çar parçeyên Kurdistanê tên meşandin, li dijî vê yekê xebateke aktîf tê meşandin. Di heman demê de bi têkoşîna xwe ya ragihandinê em ê bibin heqîqet, ji ber eşkerekirina têkoşîn û berxwedaniya gelê dide meşandin, parçeyek ji Rojnamevana ye.”
‘Em hevkarên heman êşê ne’
Nûçegihana Ajansa ANF’ê Roj Denîz axaftina xwe wiha bi dawî kir: “Berî ku ez bibin rojnemevan, ez jinek ji vê civakê bûm. Herwiha çawa ku jinên civaka me ew sîstem û kiryar li ser hatiya meşandin, bi vî rengî li ser min jî hate meşandin. Heta ku Rojnamevaneke karibe dengê jinekê derxe pêwîst e hevkarê heman êşê be. Ji ber vê yekê hewldanên me berdewam ku em dengê gel û jinên civaka xwe bighînin raya giştî.”
