Esma Mistefa/Qamişlo
Jinên Bajarê Qamişlo di komînên taxên xwe de perwerdeya li ser parêznameya Rêber Abdullah Ocalan a “Civaka Demokratîk” dibînin. Bi vê wesîleyê jin di mal û taxên xwe de dixwazin xwe perwerde bikin û li gorî perspektîvên demê xwe amede bikin.
Piştî banga Rêbert Apo a “Aştî û Civaka Demokratîk” û bi derketina parêznameya 6’emîn a “Civaka Demokratîk” tevahî gelê Kurd yên ku li ser felsefeya Rêber Apo xwe birêxistin kiriye û jiyan dike, ev parêzname xwendin. Ev parêzname di şîrovekirina çareserkirina pirsgirêka Kurd de, ji dîrokê heyanî roja îro radixe ber çavan. Her wiha gavên ku bêne avêtin wê çi bin û çawa bin, şîrove dike. Rêber Apo di vê parêznameyê de ne tenê gelê Kurd muxateb digre, hemû gelên cîhanê muxateb digre û çawaniya avakirina pargala demokratîk dinirxîne. Bi taybet ji bo gelên Bakur û Rojhilatê Sûriyê ev weke perspektîvên demê ye û li ser wê bingehê hemû sazî, dezgeh, tevger, partî û beşên civakê li ser vê parêznameyê perwerde dîtin.
Di berdewamiya xwendin û xweperwerdekirina li ser felsefeya Rêber Apo jinên Kurd yên bajarê Qamişlo di mal û taxên xwe de dest bi xwendina Rêber Apo kirine, têkildrî girîngiya xweperwerdekirina li ser parêznameyên Rêber Apo Hevseroka PYD’ê Samiye Xelîl û Endama PYD’ê Dilşa Çawîş yên bajarê Qamişlo ji Rojnameya me re axivîn.
‘Divê jin di giraniya pêvajiya dîrokî de bin’
Samiye wiha dest bi axaftina xwe kir: “Piştî banga Rêber Apo a “Aştî û Civaka Demokratîk” di dîroka doza gelê Kurd de û çareserkirina pirsgirêka Kurd de, em ketin pêvajoyekî nû. Di vê pêvajoyê de divê em xwe li gorî tişta ku ji me tê xwestin perwerde bikin û bi pêvajoyê re biherikin. Divê em jin bi taybet di giraniya vê pêvajoya dîrokî de bin û xwe birêxistin bikin. ji ber wê jî piştî derketina parêznameya 6’emîn me di taxa xwe de giropeke perwerdê ya xweste vakir. Di komînê de em her roj li hev diciviyan û me li ser felsefeya Rêbertî perwerde didît.
Di vê perwerdê de hemû jin û dayîkên ku xwedî kedin di vê xetê de hebûn. Perwerde nêzî 10 rojan dom kir û tê de şîrove, nirxandin û nîqaş pêş diketin. Dibe ku di asta ku tê xwestin de em nikaribin ji pêvajoyê û tişta ku rêber Apo ji me re dibêje re bibin bersiv, lê em di girêdana xwe bi Rêbertî û hewildana têgihiştina pêvajoyê re bi îsrar in”.
‘Bi qasî nan û avê, perwerde jî girîng e’
Samiye da zanîn ku bi qasî berpirsyartiyên malê xweperwerdekirin jî girînge wiha pê de çû: “em dayik in, helbet kar û berpirsyartiyên li ser mile me hene. Lê di aliyê xweperwerdekirinê de divê em xwe di nava kar û barê malbatê de xwe ji bîr nekin. Ger em di Rojavayê Kurdistanê de jiyan dikin, wê demê bi qasî nan û avê ji me re perwerde jî girîng e. Ger em xwe wiha birêxistin nekin wê mal, zarok û jiyana me jî ji dest me here. Ji ber wê em ê her tim di tax û komînên xwe de perwerdeyan pêş bixin”.
‘Em ê layiqî keda Rêbertî derkevin’
Her wiha Dilşa Çawîş jî diyar kir ku pirtûkên Rêber Apo ji bo wan perspektîv in û wiha got: “Ev têkoşîn û serkeftinên ku me qezenc kirine, hemû bi saya felsefeya Rêber Apo ne. Ji ber wê jî em ê bi xwendin û xweperwerdekirina di kurahiya vê felsefê de, layiqî keda Rêbertî derkevin. Bi taybet jin, di parêznameyê de gelekî behsa rola jin di dîrokê û heyanî roja îro dike, divê her jinek xwe li ser vê esasê perwerde bike. Ger em wiha nekin em ê nikaribin ji vê serdemê re bibin bersiv. Divê hemû bizanibin ku pirtûkên Rêber Apo ji bo me perspektîv in û em ê xwe li ser wan perspektîvan mezin bikin.
Em bang li hemû jinan dikin ku ji bo naskirina xwe, pêvajoya ku hatiye destpêkirin û şerkirina li hember zihniyeta ku dixwaze jinê tune bike, bila jin bixwînin û xwe pêş bixînin. Ger nikarin bixwînin, perwerdeyên devkî ku tê de her tiştî şîrove dikin û dinirxînin hene. Bila jin ji mal, tax û komîna xwe de dest pê bike da ku bibin hêzek pêşeng di rêvebirina civakê de”.
