Mihemed Seydi
Di destpêka meha Cotmehê de, şandeyeke Bakur û Rojhilatê Sûriyê li Şamê bû û bi desthilata demkî ya li Sûriyê re civiya. Di vê Civînê de nûnerê DYA yê ji bo Sûriyê Tom Barak û hin fermandarên Amerikî amade bûn. Di heman wextê de, komên ser bi “Wezareta Parastinê ya Sûriyê” ve dor li taxên Kurdan ên li Helebê girtin û dest bi êrişan kirin. Li vir rastî bersiva hêzên Ewlehiya hundirîn û Xelkê Şêxmeqsûd û Eşrefiyê hatin û şer derket. Tevî ku eşkereye yên van koman dixe tevgerê dewleta Tirk e, lê di fermiyetê de, Ehmed El-Şerie dibêje ev hêz di bin desthilat wî de ne. Di vê civîna ku li dar ketî de, ev êriş mijara sereke bûn û yekser daxwaza rawestandina êriş û dorpêçê hat kirin. Li gorî hin çavkaniyan, ji ber dewleta Tirk di vê civînê de ne amadebûye û nehatiye dawetkirin, xwestiye van êrişan pêk bîne da mesajê bighîne şandeya DYA ku ew dikarin rewşê tevlîhev bikin. Lê ji ber destwerdana hin welatên Erebî û DYA, ev êriş hatin rawestandin û dîsa li ser xala rawestandina şer li tevahî Sûriyê, hat teqezkirin.
Herwiha li gorî hin aliyan, Fermandarê QSD’ê Mezlûm Ebdî ji Ehmed El-Şerie ra gotiye ku ew dest ji daxwaza nenavendîbûnê bernadin û divê di nava rêveberiya Sûriyê de jî pirrengî hebe. Li gorî hin agahiyên taybet, Ehmed El-Şerie ji Fermandarê QSD’ê Mezlûm Ebdî re gotiye ku hin alî ji nava wan meselê xerab dikin û nahêlin danûstandinê bi QSD’ê re herin serî. Ji bo wê jî Şerie ji Ebdî re gotiye ku ew li rê û rêbazekî bigerin da nenavendîbûn pêk were, lê ewê di nava xwe de vê meselê nîqaş bikin. Ji ber aliyên dijber ên di nava Hikumeta veguhêz de, meselê xerab dikin. Herwiha di civînê de Ehmed El-Şerie gotiye ku ew ê Destûra heyî jî bugherin.
Ev gotinên Ehmed El-Şerie ji Ebdî re gotine, ji çend aliyan de mirov dikare binirxîne. An rastî tu kontrola Ehmed El-Şerie li ser van koman tine û encex dikare cihê lê dimîne de xwe biparêze û her di bin gefan de ye, an jî van komên ku êrişî herêmên Rêveberiya Xweser dikin ew li pişt wê ye û wiha dixwaze bide xuyakirin da kes wî sucdar neke. Ger bi rastî jî ne ew e yê ku hertiştî kontrol dike, kê Wezîrê Karê Derve Eseid El-Şîbanî yekser piştî civîka bi Şandeya Rêveberiya Xweser re, şand Tirkiyê? Li aliyê din, çavkaniya Mafê Mirovan a Sûriyê beriya demekê eşkere kir ku di civînekê li bajarê Laziqiyê de, wezîrê Parastinê yê desthilata Şamê Mirhef Ebû Qesra gotiye ku ew dixwazin QSD’ê bixin nava Artêşa Sûriyê û wan li nava Sûriyê belav bikin û dema ew lingên xwe bi cih bikin, ew ê bi carekê ve QSD’ê ji nav bibin.
Dixwazim bibêjim, ger herdû wezîrên herî nêzî Ehmed El-Şerie ne di kontrola wî de ne, wê demê desthilat jî ne di kontrola wî de ye û tu bawerî bi Peymanên bi wan re nayên kirin. Em bala xwe bidin ragihandina Şamê ya fermî, em ê bibînin ku ew çi difikirin. Her roj li ser Ekranên xwe banga kuştina Durziyan li Swêdayê û Elewî li Beravê û Kurdan li Bakur û Rojhilatê Sûriyê dikin. Ger Ehmed El-Şerie nikare vê propagandeya tehrîdkirin kuştinê jî rawestîne, wê demê hemû sozên ku dide jî nikare pêk bîne.
