Arîn Koçer
Di ser komploya 9’ê Cotmeha 1998’an re 27 sal derbasbûn û hîn jî bermahiyên vê komployê berdewam dikin. Di serî de ez vê komploya qirêj û bêbext, şermezar û rûreş dikim. Bimire komploya navneteweyî û hemû hêzan û hişmendiya qirêj.
Dewleta Tirk jî her li pey rojeke wiha bû ku di şexsê Rêber Apo de gelê Kurd bi temamî qir bike. Jixwe dewleteke welê ye ku hebûna xwe di qirkirina gelê Kurd de dibîne. Bi wê hişmendiyê dixwast ku Rêber Apo tine bike.
Li ser vê mantiqa komploya navneteweyî hîn jî Rêbertiya me di nava tecrîdeke girankirî de ye û di niyeta dewleta Tirk de diyar nabe ku wê tecrîdê bi dawî bike. Her kes dizane ku komploya 9’ê Cotmehê wiha xweber çênebûye. Berevajî bi awayekî pir zirav û plankirî hatiye pêşxistin. Di vê komploya navneteweyî de divê em zanibin ku ti sûcekî gel û neteweyan nîne. Bi tevahî komployeke li ser esasê berjewendiyên qirêj ên dewletan hatiye pêşxistin. Xwestin di şexsê Rêber Apo de gelê Kurd, di şexsê gelê Kurd de hêvî û daxwazên azadî û wekheviyê yên hemû gelan ji holê rakin. Hêzên emperyal û dewletên netewe yên mezin dîtin ku fikir, raman û felsefeya Rêber Apo roj bi roj pêşde diçe û gelan bandor dike. Her wiha ji bo mudaxexleya xwe ya li hember Rojhilata Navîn Rêber Apo weke astengiyeke herî mezin dîtin.
Lewma demildest xwe kirin yek û li hember Rêber Apo ketin nav pêşxistina komployê. Dema em bi çavdêriyeke hîn zêdetir zanistî û dahûrîner li mijarê temaşe dikin, em dibînin ku her çiqasî haya Tirkiyeyê jê nebû ku wê Rêbertî radestî wan bikin jî, haya wan ji komployê hebû. Ji ber Serokwezîrê demê Bulent Ecevît di hevdîtineke xwe de digot, “Min hê jî fêm nekir bê Amerîka çima Apo radestî me kir.” Rêber Apo di nav şert û mercên herî giran ên Îmraliyê de ji bo pirsgirêk bi rêyên aştiyane çareser bibin dest bi hewldanên felsefîk, ramanî û îdeolojîk kir. Ji dîrokê divê mirov çawa dersan derxe nîşanî her kesî da. Bi parêznameyên ku amade kirin, bingehê jiyana li ser esasê azadî û wekheviyê ava kir.
Di vê merheleyê de jî weke jin û civakên azadîxwaz pêwîst e, em ji bo azadiya fizîkî ya Rêber Apo têkoşînê pêş bixin. Ji bo merheleya Aştî û Çareseriya Demokratîk a Rêber Apo daye destpêkirin hîn xurttir bibe, bi hemû derfetên xwe divê em ji her demê zêdetir bixebitin. Wê jiyana azad bi azadiya Rêbertiya me misoger û mayînde bibe.
