Ayşa Silêman/ Dêrik
Şêniyên bajarê Dêrikê bi dirûşmeya ‘Bijî Berxwedana gelan’ meşeke girseyî li dar xistin têde piştgiriya gelê Şêxmeqsûd û Eşrefiyê kirin.
Şêniyên bajarê Dêrikê bi dirûşmeya ‘Bijî Berxwedana gelan’ meşeke girseyî li dar xistin têde piştgiriya gelê Şêxmeqsûd û Eşrefiyê kirin. Di meşê de hemû endamên Saziyên Rêveberiya Xweser, mamoste û xwendekar hazir bûn.
Meş ji Qada Azadî dest pê kir û li pêşiya çerxereya Şehîdan veguherî mîtîng. Di destpêka mitîngê de hemû hazir xulek bêdeng li ser giyanê şehîdan rawasetiyan.
Piştre li ser navê Meclisa Efrînê Merwan Hemo axivî û wiha got: “Berxwedaniya ku îro tê kirin gelekî pîroz e û cihê serkeftinê ye. Niha jî dem hatiye ku em şev û roj li kolanan bin û têkoşînê bikin li kêleka hêzên xwe. Ev çend rojin ku hikumeta Sûriyê taxa Eşrefiyê û Şêxmeqsûd dorpêç dike û dixwaze vîna gel bişkîne. Bi salan e gelê Kurd têkoşînê dike û xwe li ser piyan girt li hember desthilatdariya rêjîma Baas, niha jî hikumetek li şûna wê hatiye jê xirabtire, ku ne jî mafê gelan dizanê ne jî li gor biryaran dimeşe. Rojan e êrişî van herdu taxan dikin û dixwazin wan dagir bikin, lê bera di wê baweriyê de bin ku hêza me di Helebê de gavên serkeftî avêtin e. Em ji fermandar Mezlûm Ebdî re dibêjin ku îro berê xwe daye Paytexta Şamê, hemû gel û hêz li pişta te ne, heger bi çareseriyên diplomasî çênebû em ê dakevin qadan û bi zorê mafên xwe bistînin. Ji wan dewletên ku dibênin û xwe bêdeng dikin re isbat bikin ku em dikarin û em li pey doza xwe ne. Heger Ehmed Elşeri dîroka kurdan nasnake, em ê bi wî bidin naskirin û em ê wê êşa ku bi salan me di hundirê xwe de veşartiye derxin.”
Mitîng bi siloganên‘ Bijî berxwedana Şêxmeqsûd, Berxwedan jiyane’ bidawî bû.
