Arîn Koçer
Meşa Jinên azadxwaz a ji Amedê ber bi Enqereyê ve û dirûşma wan a “Em bi hêviyê ber bi azadiyê ve dimeşin” jî pir bi wate û bandor bû. Çalakvaniya jinên Kurd gelekî muezem bû. Nexasim jî ku ji paytexta Kurdistanê ber bi paytexta Tirkiyeyê ve meşiyan dibe wesîleya yekîtiya gelan.
Rêber Apo jî dibêje, “Têkoşîna jinan dibe temînata aştî û biratiya gelan.” Her dem Rêbertî bawerî daye jinan û ew weke pêşeng diyar kirine. Jin xwedî rol û mîsyon in. Di nava şoreşa Kurdistanê de jin jî bi xwe bawer bûne, bêrawestan têkoşîn dikin û hêza çalakbûnê qezenc kirine. Nasnameya xwe qezenc dikin û dibin hêza sereke ya aştî û avakirina civaka demokratîk.
Niha di van kêliyan de jî jin li ser piyan e û ketine nav hewldana pêşxistina aştiyeke mayînde. Çalakbûna jinan tesîra xwe li tevahî civakê jî dike. Ev meşa jinan ji her kesî re dibe banga rabûna ser piyan û xisûsa ku divê her kes ji bo aştiyeke bi rûmet destê xwe bixe bin kevir. Di heman demê de ji wan komên hewl didin pêvajoya Rêber Apo daye destpêkirin bixetimînin re jî dibe weke şeqamek li rûyê wan dikeve.
Em hemû jî dizanin ku komên qatil kastîk hene û her li pey xetimîna pêvajoya aştiyê ne. Dibe ku ew kom ne li ber çavan bin, lê di her serdemekê de wan koman pêvajo xerab kirine.
Rêber Apo ji sala 1993’an ve banga çareserî û aştiyê li rayedarên dewletê dike. Gelek ked ji bo aştî û biratiya gelan daye. Lê mixabin ew komên qatil kastîk her weke kelem û bend ketine ser rêya çareseriyê, pêvajo xetimandine. Ev hêz timî ji bo berjewendiyên xwe dixwazin xwîna mirovan birijin.
Wan koman dasa xwe xistine destê xwe û li ser serê gelan sekinîne. Li benda şer in ku bi milyonan mirovan bidin kuştin û dijminatiya gelan hezar salên din berdewam bike. Herî zêde jî li dora serê çareserîxwazan digerin û mirovên, demokratîk û azadîxwaz hildibijêrin. Pêwîst e were zanîn ku eger rayedarên dewleta Tirk ên weke serokê MHP’ê Devlet Bahçelî û serokê AKP ê Receb Tayyip Erdogan li gor wan komên qatil kastîk tevbigerin, wê bikevin nav şaşîtiyên pir mezin û dê pir mezin winda bikin. Li gorî tê dîtin rayedarên dewleta Tirk jî pir ji xwe ne bawer in û hîna jî serê wan tevlîhev e. Ev jî dibe sedem ku pir bi wêrekî tevnegerin.
Weke em hemû jî dişopînin û haj lê dibin, Rêber Apo bêrawestan û bi kedeke pir mezin ji bo çareseriyê dixebite, bi kelecan û İsrar têkoşîn dike. Em hemû jî dizanin ku hedef û armancên Rêber Apo însanî ne û qet û qet wê ji hedefên xwe neyê xwarê.
Rêber Apo di peyama xwe ya ji jinên ji Amedê ber bi Enqereyê ve dimeşiyan re got: “Bi zimanê wekheviyê em ê bi ser kevin” û ev nirxandina giranbûha kir, “Ez bawer dikim ku meşa ‘Em bi hêviyê ber bi azadiyê ve dimeşin’ ku ji aliyê jinên TJA ve hatiye destpêkirin, dê tevkariyeke girîng li muzakereyên demokratîk bike.” Ev peyama Rêber Apo gelekî girîng e. Divê em hemû vê peyamê ji bo xwe esas bigirin û çalak bibin.
