Ronahî Sadûn/Qamişlo
Kombenda Efrîn A Civakî li ser rewşa Efrîn û taxên Şêxmeqsûd û Eşrefiyê yên Helebê, li ber avahiya netewên yekbûyî (NY) ya li bajarê Qamişlo daxuyaniyeke nivîskî da.
Kombenda Efrîn A Civakî bi tevlîbûna gelê Efrîn ên li bajarê Qamişlo girêdayî rewşa Efrîn, taxên Şêxmeqsûd û Eşrefiyê yên Helebê li ber avahiya netewên yekbûyî NY ya li Qamişlo daxuyaniyeke nivîskî bi zimanê Erebî û Ingelîzî da.
Daxuyanî wiha hat destpêkirin: “Em Komeleya Efrîn a Civakî û Rêveberiya Karûbarên Koçberên Efrîn û Şahba bang li rayedarên demkî yên li Şamê dikin ku bi tevahî pabendî bicîhanîna madeya 5’emîn a Peymana 10’ê Adarê bibin a ku di navbera Fermandarê Giştî yê Hêzên Sûriya Demokratîk Mezlûm Ebdî û serokê demkî yê Sûriyê Ehmed El-Şeraa de hat îmzekirin, ya ku bi eşkereyî vegera ewle û bi dilxwazî ya hemû koçberên Sûriyê ji bo bajar û gundên wan û parastina wan a tevahî ji aliyê dewleta Sûriyê ve, destnîşan dike.”
Daxuyanî wiha hat domandin: “Her çend binpêkirinên mafên mirovan ên sîstematîk li herêma Efrîn berdewam dikin ji desteserkirina milkê nifûsa xwecihî bigire heya kiryarên komên bêserûber ên girêdayî Wezareta Parastinê û Dezgeha Ewlekariya Giştî ku bi Wezareta Karên Hundir ve girêdayî ye û tacîza kesên bandordar. Em dibînin ku siyaseta paşxistin û derengketinê ya ku ji hêla rayedarên Şamê ve tê meşandin tenê rewşa Sûriyê tevlihev dike û êşa Sûriyan di astên cûda de zêde dike. Herwiha em piştrast dikin ku berdewamiya sepandina bacan bi rêya qaşo “Komîteya Aborî” digel tacîza rojane û gotinên nijadperest û mezhebî, binpêkirineke eşkere ya prensîbên edalet, wekhevî û mafên mirovan e.”
Daxuyanî wiha hat bidawîkirin: “Em bang li Neteweyên Yekbûyî, rêxistinên mafên mirovan, aktorên navneteweyî û herêmî û rêxistinên civaka sivîl dikin ku zexteke zêde li ser rayedarên demkî yên li Şamê bikin, da ku wan neçar bikin ku pabendî peymanên navneteweyî yên mafên mirovan bibin û bendên peymana 10’ê Adarê bêyî paşxistin an derengxistinê bi tevahî bicîh bînin. Em mafê gelên Efrîn ji bo vegera bi awayekî rûmet û ewle û mafê wan ji bo birêvebirina karûbarên xwe û temsîlkirina îradeya civakên xwe di Meclisa Parêzgeha Helebê de ji nû ve piştrast dikin. Herwiha di rewşa heyî de ji dorpêça taxên Kurdan li Helebê, em ji nû ve piştrast dikin ku pabendbûna bi peymana 10’ê Adarê tekane rê ye ji bo dûrxistina trajediyên din ji bo Sûriyan. Şer dê sûdê nede tu kesî û dê tenê êşa gelê Sûriyê zêde bike.”
