Solîn Mihemed/ Qamişlo
Kongra Star bi daxuyaniyekê li bajarê Qamişlo Komploya Navneteweyî ya li dijî Rêber Apo şermezara kir û got: “Em ê li ser riya fikir û felsefya rêberê mirovahî û aştiyê Rêber Apo meşa azadiyê dewam bikin.”
Ji bo şermezarkirina Komploya Navneteweyî ku di 9’ê Cotmeha sala 1998’an de li dijî Rêber Apo hatibû destpêkirin û hîn jî dewam dike, Kongra Star li bajarê Qamişlo daxuyaniyek da.
Di daxuyaniyê de jinên Meclisa Malbatên Şehîda, Partiya Yekîtiya Demokratîk, Saziyên Civaka Sivîl û endamên Meclisa bajarê Qamişlo hazir bûn û daxuyanî bi zimanê kurdî hat xwendin.
Di destpêka daxuyaniyê de wiha hate gotin: “Bi navê Kongra Star ya Bajarê Qamilşo em Komploya Navnetewî ya ku li dijî Rêber Apo pêk hat, em şermezar dikin. Ji xwe ev komplo ne li ser şexsê rêber Apo tenê hat kirin, lê li ser mirovahiyê tevahî pêk hat. Ji ber ku fikir û felsefeya Rêber Apo ne tenê ji bo mafê Kurdan e, lê ji bo mafê tevahî mirovahiyê û jinan e. Her kes dizane ku eger fikir û felsefeya Rêber Apo li cîhanê belav bibe û jin xwe ji zincîra koletiyê rizgar bike wê wekhevî, demokrasî, hezkirin, hevjiyana azad, zanist û azadî pêk were, ev jî ne li gor berjewndiyên dewletên desthilatdar û sîstema baviksalarî ye, ev 27 sal in ku Rêber Apo di nava çar dîwaran de ye.”
Di dewama daxuyaniyê wiha hat gotin: “Em wekî jinên ku ji felsefeya Rêber Apo ava jiyana azad vexwarin e, emê heya nefesa xwe ya dawî li pey vê dozê bin heya ku Rêber Apo fîzîkî azad bibe û hemî jinên cîhanê azad bibin.”
Daxuyanî wiha hat bidawîkirin: “Em careke din dibêjin em ê li ser riya fikir û felsefya rêberê mirovahî û aştiyê bin, heya ku Rêber Apo rizgar nebe tu carî em rizgar nabin. Em piştgiriyê didin hemleya tevgerên jinên Azad ya Bakurê Kurdistanê.”
Di dawiya daxuyaniyê de siloganên ‘Bê Rêber Apo jiyan nabe, bijî Rêber Apo û jin jiyan azadî hatin berzkirin.
