Dilyar Cizîrî
Piştî 9 mehan Serokê hikûmeta veguhêz a Sûriyê Ehmed El Şeri beşdarî civîna giştî ya meclîsa Neteweyên Yekbûyî (NY), bû. Alîgirê El Şeri û ragihandina ser bi hikûmeta veguhêz a Sûriyê vê beşdarbûn wî wekî serkeftina herî mezin binav dikin. Nizanin heger li ser erdê û di hindir de çareserî pêk neyên derve wê tu carî dûrî berjewendiyan gavan ber bi çareseriyê ve navêjin.
Me dît çawa li Perava Sûriyê û Siwêdayê komkujî pêk anîn. Bi hezaran insan hatin kuştin. Jin hatin revandin û heta niha jî li Siwêda û Peravê jinên windayî hene. Daristanên Laziqiyê, Tertûs, Hema û Homisê têne şewitandin. Di mijarên xizmetguzariyê de gavan navêjin.
Di mijara danûsitandinên bi QSD’ê û Rêveberiya Xweser re tevî peymana 10’ê Adarê hatiye imzekirin, nikarin di pêkanînê de biryaran bistînin. Berûvajî hîn di siyasetên xwe yên inkar, ne qebûlkirin û zordariyê de bi israrin. Di daraza destûrê de kopiya rêjîma Baas bi qabekî nû vejîn dikin. Di kongreya xwe ya niştimanî de heman tiştî pêk tînin. Hîn jî naxwazin rastiyan bibînin.
Rişma xwe bi temamî radestî istxbarata Tirkiyê kirine û li gorî berjewendiyên wê tevdigerin. Gihiştiye asta Serokê Hikûmeta HTŞ’ê Ehmed El Şeri bi hêza dewleta Tirk gefan li Bakur û Rojhilatê Sûriyê bixwe. Ev di gotina wî ya li ser saziyên ragihandinê “Dibe Tirkiyê li dijî Bakur û Rojhilatê Sûriyê êrişan pêk bîne.” Asta girêdana wan bi dewleta Tirk ve xuya dike. Li şûna çareserkirina pirsgirêkên gelê Sûriyê yê bi salan zulim û zordarî kişandiye çareser bikin. Xwe davêje himbêza dewleta Tirk û Erdogan. Êrişên li Dêrhafirê, girtina riya di navbera Heleb û Reqayê, êrişên li Dêrazorê yên bi destê DAIŞ’ê têne kirin. Hewldanên belavkirina kîndariyê û derxistina tevliheviyê li herêmên Bakur û Rojhilatê Sûriyê hemû di vê çarçoveya hevkariya wan de pêk tên. Heger rayedarên hikûmeta veguhêz a Sûriyê di vê siyaseta xwe de berdewam kirin û di hindirê Sûriyê de gav neavêtin, dê nikaribe bi civînên Neteweyên Yekbûyî hebûna xwe rewa bikin. Gelê Sûriyê li benda guhertinan in. Ne li benda şer, alozî û nakokiyên din in.
Tişta balkêş ew e Hikûmeta veguhêz nikare xwe ji vê xeleka heyî derbixe Ji lewma jî nikare li ser erdê tu pirsgirêkan çaerser bike. Alozî û bermahiyên hikûmeta hilweşiyayî ya rêjîma Baas kûrtir dike. Beşar El Esed xwe spartibû Îran û Rûsiya û çarenûsa wî dawî xuya kir. Ehmed El Şeri jî xwe spartiya dewleta Tirkiyê û li ber bayê wan diçe.
Bê guman heger El Şeri bi vê zihniyeta xwe dewam dike kir, wê çarenûsa wî ya rêjîma Beşar El Esed be. Ev nêzîk be yan dûr be. Ne mumkine gelê Sûriyê qebûl bike careke din xwe di bin siya zulim û zordariyê desthilateke tundrew de bihêle. Bayê guhertinê ya Rojava destpêkir, derbasî Bakur û Rojhilatê Sûriyê bû. Niha di Siwêda û Perava Sûriyê de liba dibe. Yekîneyên Parastina Jinan a Siwêdayê vê rastiyê nîşan dide. Ehmed El Şeri û Wezîrê wî El Şêbanî li derve çi bikin bila bikin, çavkaniya guhertinê di nava gel de ye.
