Dîlan Mulhim\Qamişlo
Hevseroka TEV-Çandê ya Bakur û Rojhilatê Sûriyê diyar kir ku Tevgera Çandê ya Mezopotamya bi hevkariya Şaredariya bajarê Qamişlo dest bi çêkirin û xemilandina parka giştî ya bajarê Qamişlo kiriye û got, “Xwezaya bajarê me jiyana me ye.”
Tevgera Çandê ya Mezopotamya bi hevkariya şaredariya gel a bajarê Qamişlo, ji bo çêkirin û xemilandina parka giştî ya bajarê Qamişlo dixebitin. Da ku ew dîsa bibe ciheke xweşik ji bo bêhinvedanê û xizmeta niştecihên bajar bike. Di derbarê mijarê de hevseroka TEV-Çand ê ya Bakur û Rojhilatê Sûriyê, Sumeya Mihmed ji Rojnameya me re axivî.
Parka Giştî ya Qamişlo tê çêkirin û xemilandin
Sumeya Mihmed da zanîn ku Tevgera Çandê ya Mezopotamya bi hevkariya şaredariya gel a bajarê Qamişlo dest bi çêkirin û xemilandina parka giştî ya Qamişlo kirIye û wiha got: “Weke Tevgera Çandê ya Mezopotamiya me xwest ku xwedî li parka giştî ya bajarê Qamişlo derkevin. Parka giştî ya bajarê Qamişlo bIbû çolistan û tevahiya daranên wê hişk bibûn. Ji ber vê yekê me pêwîstî dît ku vê parkê ji nû ve çêkin û bixemilînin. Herwiha tenê TEV-Çand bi çêkirin û xemilandina parkê rabû ye, da ku wê veguherîne gulîstana çand û hunerê. Di vê parkê de wê hemû cureyên kurdewariyê hebin, di heman demê de wê peyîkerên hunermedanan lê werin bicihkirin. Tiştên çandî yên ku bi destan tên çêkirin, herwiha beşên wênesaziyê jî wê hebin û di nava parkê de wê nafûrek jî were çêkirin. Cihên kafê wê were serrastkirin û cihên muzîkê li parkê were çêkirin.”
‘Li parka giştî ya Qamişlo 500 dar wê werin çandin’
Sumeya Mihmed da zanîn ku di şiklê parka giştî ya bajarê Qamişlo de guhertin hatine çêkirin û wiha pê de çû: “Li parka giştî ya bajarê Qamişlo 500 dar wê werin çandin, herwiha wê gelek cureyên gulan jî werin çandin. Di heman demê de, wê gelek berhemên dîrokî yên kurdî lê werin bicihkirin. Mesrefa xemilandin û çêkirina parkê nêzî 100 hezar dolar dike, bêguman ev yek têrê nake. Ji ber ku heger tu li gorî xwe parkê bixemilîne nêzî 300 hezar dolar pêwîst e. Ji ber ku dîkorên li parkê werin bicihkirin gelek mesref pêwîst e. Lê em ê hewl bidin ku her sal dîkorên parkê zêde bikin, ev yek jî li gorî derfetên di nava destê me de ne.”
Hevseroka TEV-Çandê ya Bakur û Rojhilatê Sûriyê Sumeya Mihmed axaftina xwe wiha bi dawî kir: “Em hewl didin ku heta serê salê çêkirin û xemilandina parka giştî ya bajarê Qamişlo bi dawî bikin. Di heman demê de, ez bi hêvî me ku her kes xwedî li parastina xwezaya bajar derkeve. Ji ber ku parastina xwezaya bajar erkê her kesî ye.”
