Hemza Sêvo/ Qamişlo
Endamê rêveberiya Însiyatîfa Sûriyê ya ji bo Azadiya Fîzîkî ya Rêber Abdullah Ocalan, Ferzende Munzir eşkere kir ku heya niha 2 hezar û 6 kes tevlî kampanyaya “Ez dixwazin bi Abdullah Ocalan re hevdîtinê bikim” bûne.
Di bin diruşmeya “Ez dixwazim bi Abdullah Ocalan re hevdîtinê bikim” de, di 5’ê Pûşberê de, kampanyayek cîhanî hate destpêkirin.
Armanc ew bû ku dewleta Tirk di zûtirîn dem de derfetê li pêşiya hevdîtina bi Rêber Abdullah Ocalan re pêk bîne. Herwiha Rêber Apo piştî 26 salan ji tecrîda fêzîkî were azadkirin.
Însiyatîfa Sûrî ji bo Azadiya Rêber Abdullah Ocalan û Însiyatîfa Parêzerên Sûrî ji bo Parastina Rêber Abdullah Ocalan di 20’ê Tebaxê de tevlî vê kampanyayê bûn.
Ev kampanya ji wê rojê ve kete meriyetê û wê heya roja 10’ê Îlûnê deng, name û navên ku wê tevlî kampaniyayê bibin, bên qebûlkirin.
Derbarê vê kampanyayê de endamê rêveberiya Însiyatîfa Sûrî ji bo Azadiya Rêber Abdullah Ocalan, endamê rêveberiya însiyatîfê Ferzende Munzir ji rojnameya me re axivî.
‘2006 kes tevlî kampanyayê bûne’
Munzir eşkere kir ku heya roja îro 2006 kesan navê xwe ji bo pêkanîna hevdîtinê bi Rêber Abdullah Ocalan re tomar kirine û wiha domand: “Kampanyaya ji bo hevdîtina bi Rêber Apo bi daxuyaniyekê di 20’ê Tebaxê da destpêkir, ev yek jî piştgiriyek bû ji bona kampanyaya cîhanî. Berî ku em dest kampanyaya xwe bikin, plan hat dayîn, amadekariyên ji bo birêvebirina pêngavê hatin kirin. Bi destpêkirina kampanyayê re armanca me ew bû ku em dengê akademîsyen, parêzer, çalakvan, siyasetmedar, rewşenbîr, serokeşîr, qebîle û kesayetên olî yên Bakur û Rojhilatê Sûryê û tevahiya Sûriyê bigirin dest. Lê piştî wê me dît gelek qadên din ên ji civakê weke bijîşk, endezriyar û hwd…. dixwazin navê xwe ji bo hevdîtina bi Rêber Apo re tomar bikin û tevlî kampanyayê bibin. Ev kampanî li ser asta tevahiya Sûriyê, ji hemû parêzgehên Sûriyê weke Şam, Heleb, Tertûs, Laziqiyê, Siwêdayê û hwd… tevlî bûn. Bi giştî vê pêngavê hemû rengên gel û pêkhateyên Sûriyê hembêz kir, bi rengekî rasterast nav hatin tomarkirin, herwiha gelek kes bi riya onlaynê tevlî bûn. Niha jî hejmara kesên ku tevlî kampanyayê bûn 2006 kes in, ev pêngav heya 10’ê Îlûnê wê dewam bike.”
‘Wê encamên kampanyayê ji çar saziyên navnetewî re, were şandin’
Ferzende Munzir da zanîn ku wê encamên kampanyayê di Roja Aştiyê ya Cîhanî de bên eşkerekirin, paş ji 4 saziyên navnetewî re bên şandin û wiha qedand: “Piştî komkirina navê kesên ku daxwaza hevdîtinê bi Rêber Apo re kirine, wê ew nav li gorî pîvan û sîfeta wan ên weke rewşenbîr, akademisyen, parêzer û hwd… bên dabeşkirin. Piştî wê jî em ê di 21’ê Îlûnê de ku roja Aştiya Cîhanî ye, encamên kampanyayê eşkere bikin. Paşê em ê, ji saziyên netewî yên weke Neteweyên Yekbûyî, Meclisa Ewropî, CPT û Meclisa Hiqûqî ya Neteweyên Yekbûyî re bişînin. Dewleta Tirk bangî biratî û aştiyê dike, lê ji bo pêvajoyê gavan navêje, heya niha tişta erênî ku bûye, damezrandina komisyonê ye, lê wekî din dewleta Tirkiyê giran tevdigere. Rêber Apo di vê hevdîtina dawî bi şandeyê re çêkir, perspektîf dan, Rêbertî bal kişand ser pêvajoyê û got, “Aştî ne tenê bi bêdengiya çekan pêk tê, pêvajo bi demokrasiyê, azadî û edaleta civakî pêk tê, lewma jî pêwîst e di vê çaçoveyê de dewleta Tirk gavên bi cesaret bavêje.”
