Dîlan Mulhim\Qamişlo
Endamê rêveberiya Komîna Şano ya kantona Cizîrê Enwer Mihemed diyar kir ku Komîna Şano wê di 28’ê Tebaxê de bi dûrşmeya “Şano Pirojeya Jiyanê Ye” rêzesemînerên şanoyê li dar bixe û got: “Armanca me lihevcivandina pisporên şano yê kantona Cizîrê ye.”
Komîna Şano ya Kantona Cizîrê wê bi dûrişmeya “Şano Pirojeye Jiyanê Ye” di 28’ê Tebaxê de rêzek ji semîner û rûniştinên şanoyê li dar bixe. Ev yek jî ronahiyê dide girîngiya şano û rola di avakirina mirov û civakê de. Ev semîner û rûniştandin jî wê her 15 rojan û di roja pêncşemê de werin lidarxistin û ev semîner wê li hola Komîna Şano ya kantona Cizîrê were dayîn. Herwiha dema bi dawîbûna van semîneran ne diyar e.
Di derbarê mijarê de, endamê rêveberiya komîna Şano ya kantona Cizîrê Enwer Mihmed ji Rojnameya me re axivî.
‘Armanca me lihevcivandina Pisporên şano ye’
Enwer Mihmed da zanîn ku du beşên wan yên çalakiyan hene, beşê yekemîn lidarxistina semînerên şano ye û beşê duyemîn jî kesên girêdayî Şano wê werin xelatkirin û wiha got: “Em ê bi dirûşmeya “Şano Pirojeya Jiyanê Ye” di 28’ê Tebaxê de rêzek ji semîner û rûniştandinên şano li dar bixin. Ev semîner jî her 15 rojan wê werin dayîn û wê girêdayî şanoya kurdî, erebî û cîhanî be. Herwiha ev semîner ji aliyê derhênerên kurd, ereb û suryanî ve wê werin dayîn û armanca me ji van semîneran ew e, ku pisporên şanoyê yên kantona Cizîrê lihevbicivin, di heman demê de jî da ku naskirinek di navbera pisporên şano yên kantona Cizîrê de were çêkirin. Lewma bi riya van semîneran gelek nîqaş li ser girîngiya şano wê werin kirin.”
‘Belavkirina xelatan piştgirtiyeke razberî ye’
Mihmed axaftina xwe wiha berdewam kir: “Em ê di beşa duyemîn a çalakiyan de, xelatan belavbikin. Ev xelat jî li kesê girêdayî şano wê werin belavkirin. Di heman demê de, wê her pêncşem kesek were xelatkirin. Herwiha ev xelat li kesên Şanoger, hunermed, derhêner û hwd.. werin belavkirin. Ev xelat jî piştgirtiyeke mehnewî ye, hem jî ji bo ked û xebatê ku daye dibe piştgirî jêr e. Ev çalakî wê her 15 rojan li hola komîna Şano ya kantona Cizîrê were lidarxistin, lê dema bi dawîkirina van çalakiyan ne diyar e.” Endamê rêveberiya Komîna Şano ya kantona Cizîrê Enwer Mihmed axaftina xwe wiha bi dawî kir: “Ez bi hêvî me ku kesên li Şano temaşe dikin, herwiha kesên di nava şanoyê de cih digrin sûdê ji şanoyê bigirin.”
